Live Updates

اقوام متحدہ کے انسانی حقوق کے ڈپٹی ہائی کمشنر کا اسرائیل اور ایران کے درمیان فوری کشیدگی کم کرنے کا مطالبہ

جمعرات 19 جون 2025 17:07

جنیوا (اُردو پوائنٹ اخبارتازہ ترین - اے پی پی۔ 19 جون2025ء) اقوام متحدہ کے انسانی حقوق کے ڈپٹی ہائی کمشنر ندا النشیف نے اسرائیل اور ایران کے درمیان کشیدگی کے درمیان آبادی والے علاقوں کو نشانہ بنانے پر گہری تشویش کا اظہار کرتے ہوئے فریقین سے فوری کشیدگی کم کرنے کا مطالبہ کیا ہے۔انہوں نےجنیوا میں انسانی حقوق کونسل میں ایران کے بارے میں ایک سیشن کے دوران خطاب کرتے ہوئے دونوں فریقین پر زور دیا کہ وہ میزائل حملوں کے تبادلے کو ختم کرنے اور پرامن حل تلاش کرنے کے لیے فوری طور پر سفارتی سطح پر بات چیت کریں۔

انہوں نے کہا کہ انسانی حقوق کے ہائی کمشنر کا دفتر صورتحال پر گہری نظر رکھے ہوئے ہے۔ انہوں نے وسیع پیمانے پر انتباہات کے بعد ہزاروں شہریوں کے تہران کو چھوڑنے کی رپورٹس کو نوٹ کیا۔

(جاری ہے)

انہوں نےتازہ ترین اعداد و شمار کا حوالہ دیا جو اس بات کی نشاندہی کرتے ہیں کہ اب تک ایران میں 200 سے زیادہ اور اسرائیل میں 24 افراد ہلاک ہو چکے ہیں۔ اقوام متحدہ کے انسانی حقوق کے ڈپٹی ہائی کمشنر نے دونوں فریقین سے بین الاقوامی قانون کی مکمل پابندی خاص طور پر گنجان آباد علاقوں میں شہریوں کے تحفظ اور شہری انفراسٹرکچر پر حملوں سے بچنے کی ضرورت پر زور دیا ۔

انہوں نے تمام بااثر سٹیک ہولڈرز پر زور دیا کہ وہ مذاکرات کو ترجیح دیں۔ دریں اثنا جنیوا میں اقوام متحدہ میں ایران کے مستقل نمائندہ علی بحرینی نے کہا کہ اسرائیل کی جانب سے ایران میں رہائشی علاقوں پر مسلسل اندھا دھند حملے، اہم رسد اور پینے کے پانی کے ذرائع کو نشانہ بنانے سے ایرانی شہری براہ راست متاثر ہو رہے ہیں۔ انہوں نے خبردار کیا کہ اسرائیل کی جانب سے ایران کی جوہری تنصیبات کو دانستہ طور پر نشانہ بنانے سے مقامی کمیونٹیز کو سنگین تابکار آلودگی کے خطرے سے دوچار کیا جا سکتا ہے۔