Live Updates

حکومت نے متوازن، ترقیاتی اور فلاحی بجٹ بنایا، تعلیم، صحت، روزار اور ترقیاتی منصوبوں کو ترجیح دی گئی،وزیراطلاعات آزاد کشمیر

جمعرات 19 جون 2025 20:00

مظفرآباد(اُردو پوائنٹ اخبارتازہ ترین - این این آئی۔ 19 جون2025ء)وزیراطلاعات آزادحکومت ریاست جموں وکشمیر پیر محمد مظہر سعید شاہ نے کہا ہے کہ چوہدر ی انوارالحق کی سربراہی میں قائم اتحادی حکومت نے متوازن، ترقیاتی اور فلاحی بجٹ بنایاجس میں عوام کو ریلیف، تعلیم، صحت، روزگار اور ترقیاتی منصوبوں کو ترجیح دی گئی ہے۔ بجٹ میں آٹے اور بجلی پر سبسڈی کے ساتھ ساتھ مساجد کو دوسویونٹ تک مفت بجلی کی فراہمی کو جاری رکھاگیا ہے۔

آزادکشمیر کے عوام کو صحت کارڈ کی سہولت فراہم کرنے جارہے ہیں جس کے لیے حکومت نے بجٹ میں دو ارب روپے مختص کردیے ہیں۔ ان خیالات کا اظہار انہوں نے پوسٹ بجٹ کانفرنس اوراس کے بعد میڈیا کے نمائندگان سے گفتگو کرتے ہوئے کیا۔ وزیراطلاعات نے کہاکہ موجودہ بجٹ عوامی امنگوں، عوام کی ضروریات اور ترقیاتی اہداف کو مدنظر رکھتے ہوئے تیار کیا گیا ہے۔

(جاری ہے)

انہوں نے کہاکہ اس بجٹ پر عمل درآمد سے آزادخطہ میں ترقی کے ایک نئے دور کا آغاز ہو گا اور عوام کی زندگیوں میں ایک نمایاں تبدیلی رونما ہو گی۔وزیراطلاعات نے کہاکہ ایک بہترین بجٹ پیش کرنے پر وزیراعظم آزادکشمیر، وزیرخزانہ اور انکی ٹیم کو مبارکباد پیش کرتے ہیں۔ عوام کی زندگیوں میں آسانیاں لانے کے لیے حکومت ذمہ داری سے اپنے فرائض سرانجام دے رہی ہیں۔