مصری مصنف احمد المسلمانی کا پاکستانی سفیر کے ساتھ مصری ڈراموں کے اردو میں ترجمہ پر تبادلہ خیال، سفیر کو ام کلثوم کے نغموں کا البم بھی پیش کیا

جمعہ 20 جون 2025 17:17

قاہرہ (اُردو پوائنٹ اخبارتازہ ترین - اے پی پی۔ 20 جون2025ء) مصر میں پاکستان کے سفیر عامر شوکت نے جمعہ کو یہاں نجیب محفوظ سٹوڈیو کا دورہ کیا جہاں مصری مصنف اور نیشنل میڈیا اتھارٹی کے سربراہ احمد المسلمانی نے ان کا خیرمقدم کیا اور دونوں اطراف کے درمیان تعاون کے امکانات پر تبادلہ خیال کیا۔

(جاری ہے)

پاکستانی سفارتخانہ کی ایکس پر پوسٹ کے مطابق ملاقات کے دوران نیشنل میڈیا اتھارٹی کے سربراہ نے سفیر کو بعض مصری ڈراموں کا اردو میں ترجمہ کرنے کے حوالے سے اتھارٹی کے وژن سے آگاہ کیا جو پاکستان کی قومی زبان ہے اور دنیا کی دس سب سے زیادہ بولی جانے والی زبانوں میں سے ایک ہے۔

پاکستانی سفیر نے اس کے جواب میں پاکستانی قومی ٹیلی ویژن پر اردو میں ڈب کیے گئے مصری ڈراموں کو نشر کرنے کی تجویز دی۔ پاکستانی سفیر کو احمد المسلمانی نے"محفوظ سٹوڈیو" کے دورے کے دوران"سٹار آف دی ایسٹ" ام کلثوم کے نغموں کا البم بھی پیش کیا جسے اتھارٹی سے منسلک قاہرہ وائس کمپنی نے تیار کیا ہے۔ پاکستانی سفیر نے نیل اور اہرام دونوں کے سٹوڈیو نظارے کی تعریف کی۔ انہوں نے مصر اور پاکستان کے درمیان دہائیوں پر محیط تاریخی تعلقات اور امن اور خوشحالی کے فروغ میں مصری ریاست کے کردار کو بھی سراہا۔