Live Updates

گورنرخیبرپختونخوا فیصل کریم کنڈی سے سابق رکن قومی اسمبلی حمیداللہ جان کی ملاقات

جمعہ 20 جون 2025 17:47

پشاور (اُردو پوائنٹ اخبارتازہ ترین - اے پی پی۔ 20 جون2025ء) گورنر خیبرپختونخوا فیصل کریم کنڈی سے سابق رکن قومی اسمبلی حمیداللہ جان کی قیادت میں جمعہ کے روز قبائلی جرگہ نے گورنر ہائوس پشاور میں ملاقات کی۔قبائلی جرگہ نے گورنر خیبرپختونخوا کو انضمام کے بعد قبائلی عوام کے مسائل میں اضافہ اور بڑھتی بے چینی سے آگاہ کیا۔جرگہ اراکین نے بجٹ میں ضم اضلاع پر ٹیکسوں کے نفاذ پر اپنے شدید تحفظات کا اظہار کیا۔

قبائلی عمائدین نے ضم اضلاع میں انڈسٹری پر دس فیصد ٹیکس کے نفاذ کو ظالمانہ اقدام قرار دیا۔جرگہ اراکین نے باڑہ سمیت دیگرقبائلی علاقوں میں متاثرین آپریشن کو معاوضوں کی تاحال عدم ادائیگی سے متعلق بھی آگاہ کیا۔اس موقع پر گورنر فیصل کریم کنڈی نے کہاکہ انضمام کے بعد قبائلی عوام سے کئے گئے وعدوں پر مکمل عملدرآمد ہونا چاہئے،وفاق کیساتھ قبائلی عوام کا وکیل بن کر کام کر رہاہوں، ہر فورم پر کہا ہے کہ قبائلی عوام کے انضمام کے بعد محرومیوں کا خاتمہ کیا جائے۔

(جاری ہے)

فیصل کریم کنڈی نے کہاکہ سابقہ فاٹا میں ترقیاتی اقدامات کیلئے سٹیرنگ کمیٹی میں قبائلی عمائدین کی تجاویز پیش کی جائیں گی،ضم اضلاع میں ترقیاتی اقدامات کے حوالے سے مقامی عمائدین علاقہ کی تجاویز و آراء کا مکمل احترام کرتے ہیں،ہمارے صوبہ کے مسائل ہم نے خود حل کرنے ہیں۔گورنرنے کہاکہ پرامن و ترقی یافتہ خیبرپختونخوا کیلئے ہمیں خود متحد ہو کر کام کرنا ہو گا۔