Live Updates

حکومت کی اتحادی جماعت پیپلزپارٹی کا جنوبی پنجاب کیلئے بجٹ پر تحفظات کا اظہار

بجٹ میں اگر جنوبی پنجاب کیساتھ ناانصافی ہوگی تو الگ صوبےکی آواز آئے گی، وسطی پنجاب کی ترقی پر ہمیں ہونی اعتراض نہیں لیکن بجٹ میں ناانصافی ہوئی ہے، رکن اسمبلی پیپلزپارٹی علی حیدر گیلانی

ثنااللہ ناگرہ جمعہ 20 جون 2025 23:03

حکومت کی اتحادی جماعت پیپلزپارٹی کا جنوبی پنجاب کیلئے بجٹ پر تحفظات ..

لاہور (اُردو پوائنٹ اخبارتازہ ترین۔ 20 جون 2025ء) پیپلزپارٹی کے رکن اسمبلی علی حیدر گیلانی نے کہا ہے کہ بجٹ میں اگر جنوبی پنجاب کیساتھ ناانصافی ہوگی تو الگ صوبے کی آواز آئے گی، وسطی پنجاب کی ترقی پر ہمیں ہونی اعتراض نہیں لیکن بجٹ میں ناانصافی ہوئی ہے۔ میڈیا کے مطابق حکومت کی اتحادی جماعت پیپلزپارٹی کے رکن اسمبلی علی حیدر گیلانی نے جنوبی پنجاب کیلئے بجٹ پر تحفظات کا اظہار کرتے ہوئے کہا کہ اسپیکر پنجاب اسمبلی سے کمیٹی بنانے کا مطالبہ کرتے ہیں، بجٹ میں اگر جنوبی پنجاب کیساتھ ناانصافی ہوگی تو الگ صوبے کی آواز آئے گی، وسیب کے لوگ کہتے ہیں اگر جنوبی پنجاب کیلئے پیسے نہیں لاسکتے تو کم از کم ایوان تک ہماری آواز پہنچائیں۔

الگ صوبہ مانگنا ہمارا حق ہے اور ہم الگ صوبہ لیں گے۔

(جاری ہے)

دوسری جانب وزیر اعظم شہباز شریف نے بھی وفاقی مالیاتی بل کی ترامیم پر تحفظات دور کرنے کیلئے کمیٹی قائم کر دی۔ وزیراعظم شہباز شریف نے آئندہ مالی سال کے بجٹ کی ترامیم پر تحفظات دور کرنے کے لیے اعلی اختیاراتی کمیٹی قائم کی جس میں وزیر قانون، وزیر اقتصادی امور اور چیئرمین ایف بی آر بھی شامل ہیں۔

چیئرمین فیڈرل بورڈ آف ریونیو کاکہنا ہے کہ وزیر خزانہ محمد اورنگزیب کی سربراہی میں کمیٹی ترامیم کا ازسرنو جائزہ لے گی اور جلد سفارشات وزیر اعظم کو پیش کرے گی۔ چیئرمین ایف بی آر نے کہا کہ ٹیکس فراڈ پر تفتیش ضابطہ فوجداری 1898ء کے تحت ہوگی، مجوزہ ترامیم گرفتاری کے اختیارات کو محدود اور شفاف بناتی ہیں، گرفتاری اب صرف کمشنر ان لینڈ ریونیو کی منظوری کے بعد ممکن ہوگی۔

انہوں نے بتایا کہ بدنیتی پر مبنی گرفتاری کی صورت میں معاملہ چیف کمشنر کو بھیجا جائے گا۔ چیئرمین ایف بی آر نے کہا کہ ترامیم ایماندار ٹیکس دہندگان کے تحفظ اور فراڈ کرنے والوں کے خلاف کارروائی کے لیے ہیں۔ کمیٹی ٹیکس افسران کے اختیارات کے ممکنہ غلط استعمال کی روک تھام کیلئے اقدامات بھی تجویز کرے گی۔