پاکستان ای کامرس ایسوسی ایشن کی لاہور چیمبرسے ای کامرس سیکٹر پر عائد نئے ٹیکسز کے مسائل کےحل کیلئے مدد طلب

ہفتہ 21 جون 2025 16:52

لاہور (اُردو پوائنٹ اخبارتازہ ترین - اے پی پی۔ 21 جون2025ء) پاکستان ای کامرس ایسوسی ایشن نے لاہور چیمبر آف کامرس اینڈ انڈسٹری سے ای کامرس سیکٹر پر عائد نئے ٹیکسز کے مسائل کے حل کےلئے مدد طلب کر لی ہے۔ وفد نے لاہور چیمبر کے صدر میاں ابوذر شاد سے ملاقات میں خدشات کا اظہار کرتے ہوئے کہا کہ لاہور چیمبر پاکستان کی ابھرتی ہوئے ڈیجیٹل کاروبار کے تحفظ کے لیے خصوصی کردار ادا کرسکتا ہے۔

اس موقع پر سابق صدر لاہور چیمبر محمد علی میاں، عمران حیدر ، شہباز صدیق اور وفد کے دیگر اراکین نے بھی خطاب کیا جبکہ لاہور چیمبر کی ایگزیکٹو کمیٹی کے اراکین خرم لودھی، آمنہ رندھاوا اور رانا محمد نثار بھی موجود تھے۔وفد نے صدر لاہور چیمبر کو آگاہ کیا کہ پیچیدہ ٹیکس اقدامات کے اچانک نفاذ سے ای کامرس سیکٹر میں شدید بے چینی پیدا ہوئی ہے۔

(جاری ہے)

وفد نے کہا کہ حکومت نے حالیہ پالیسی تبدیلیاں متعلقہ سٹیک ہولڈرز سے مشاورت کے بغیر کیں جن میں مبہم قانونی اصطلاحات کی وجہ سے الجھن پیدا ہو رہی ہے جس کے نتیجے میں آن لائن کاروبار کرنے والوں اور مارکیٹ پلیسز کو آپریشنل غیر یقینی صورتحال کا سامنا ہے۔وفد نے نشاندہی کی کہ جی ایس ٹی، سیلز ٹیکس اور انکم ٹیکس کی لازمی رجسٹریشن کی شرط چھوٹے اور گھریلو کاروبار کرنے والوں کے لیے اضافی بوجھ بن جائے گی اور یہ اقدامات نئے کاروباری افراد کو ڈیجیٹل معیشت میں داخل ہونے سے روکیں گے۔

مزید برآں کیش آن ڈیلیوری پر آن لائن ادائیگیوں کی نسبت زیادہ ودہولڈنگ ٹیکس عائد کرنا امتیازی سلوک اور حکومت کی ڈیجیٹل ادائیگیوں کو فروغ دینے کی پالیسی سے متصادم ہے۔صدر لاہور چیمبر میاں ابوذر شاد نے ڈیجیٹل انٹرپرینیورز اور سٹارٹ اپس کو بھرپور تعاون کا یقین دلایا ۔ انہوں نے ٹیکس اتھارٹیز اور ڈیجیٹل بزنس کمیونٹی کے درمیان فوری مذاکرات کی ضرورت پر زور دیا تاکہ ان مسائل کو باہمی افہام و تفہیم سے حل کیا جا سکے۔