پنجاب حکومت کا غریب دیہی خواتین کو مفت بھینسیں اور گائے فراہم کرنے کا فیصلہ

وزیراعلیٰ مریم نواز کے لائیو سٹاک اثاثہ جات پروگرام کے تحت پہلے مرحلے میں 4 ہزار 870 مویشی دیئے جائیں گے

ساجد علی ہفتہ 21 جون 2025 16:42

پنجاب حکومت کا غریب دیہی خواتین کو مفت بھینسیں اور گائے فراہم کرنے ..

لاہور ( اُردو پوائنٹ اخبارتازہ ترین۔ 21 جون 2025ء ) پنجاب حکومت نے غریب دیہی خواتین کو مفت بھینسیں اور گائے فراہم کرنے کا فیصلہ کرلیا۔ ترجمان صوبائی حکومت کے مطابق وزیراعلیٰ پنجاب مریم نواز نے جنوبی پنجاب کے دیہات میں رہنے والی خواتین کے لئے ایک تاریخ ساز قدم اٹھایا ہے، جس کے تحت وزیراعلیٰ مریم نواز کی طرف سے غریب اور نادار دیہی خواتین کے لئے بہتر ذریعہ روزگار کا اہتمام کرتے ہوئے دیہات میں رہنے والی غریب بیوہ خواتین کو مفت بھینسیں اور گائے دی جائیں گی، وزیراعلیٰ مریم نواز کے بے مثال پروگرام کے پہلے مرحلے میں 4 ہزار 870 مویشی دیئے جائیں گے، سی ایم پنجاب لائیوسٹاک اثاثہ جات پروگرام کا مقصد دودھ کی پیداوار میں اضافہ اور دیہی خواتین کے لئے گھر بیٹھے روزگار کا اہتمام کرنا ہے۔

(جاری ہے)

بتایا گیا ہے کہ جنوبی پنجاب کے 12 اضلاع میں 2 ارب روپے سے 11 ہزاردیہی خواتین کو بھینسیں اور گائے دی جائیں گی، وزیراعلیٰ لائیو سٹاک اثاثہ جات پروگرام کے تحت ڈیرہ غازی خان، مظفر گڑھ، راجن پور، لیہ اور کوٹ ادو میں دیہی خواتین کو فری مویشی دیئے جائیں گے، ملتان، خانیوال، لودھراں، وہاڑی، رحیم یار خان اور بہاولپور میں بھی دیہی خواتین کو بہتر ذریعہ معاش کے لئے مفت مویشی دیئے جائیں گے، 55 سال تک عمر کی مطلقہ اور بیوہ غریب خواتین گھر بیٹھے ایپ کے ذریعے بھی اپلائی کر سکتی ہیں۔

اس حوالے سے وزیراعلیٰ پنجاب مریم نواز کا کہنا ہے کہ دیہی خواتین مفت مویشی حاصل کرنے کے لیے شفاخانہ حیوانات میں وزیراعلیٰ سہولت ڈیسک سے بھی رابطہ کر سکتی ہیں، دیہات اور شہروں میں غربت کا فرق مٹانا، ہمارا عزم ہے، معاشی ترقی دیہات میں رہنے والی بیٹی کا بھی حق ہے، شہروں اور دیہات میں مساوی معاشی مواقع فراہم کر رہے ہیں، عورت شہر میں ہو یا دیہات میں تعلیم، صحت اور روزگار اس کا بنیادی حق ہے۔