پنجاب حکومت کا اکتوبر میں ایک لاکھ گھروں کا ہدف مکمل کرنے کا فیصلہ

لاہور (اردوپوائنٹ اخبارتازہ ترین۔ انٹرنیشنل پریس ایجنسی۔ 13 اگست 2025 ) محکمہ ہاؤسنگ پنجاب میں '' اپنی چھت اپنا گھر'' پروگرام کے حوالے سے اہم جائزہ اجلاس منعقد ہوا، جس کی صدارت اسپیشل سیکرٹری ہاؤسنگ وقار عظیم نے کی۔ اجلاس میں پروگرام ڈائریکٹر ولید بیگ نے اب تک کے اہداف اور پیش رفت سے آگاہ کیا۔اجلاس کو بتایا گیا کہ اکتوبر تک ایک لاکھ گھروں کا ہدف حاصل کرنے کے لیے اقدامات مزید تیز کر دیے جائیں گے۔

اب تک 75 ارب روپے قرضہ جات کی مد میں مستحق خاندانوں میں تقسیم کیے جا چکے ہیں۔ مجموعی طور پر 9 ہزار سے زائد گھر مکمل ہو چکے ہیں، جبکہ 56 ہزار سے زائد گھروں پر تعمیر کا کام جاری ہے۔ مزید بتایا گیا کہ 62 ہزار 500 سے زائد خاندانوں کو پہلی قسط جبکہ 39 ہزار سے زائد خاندانوں کو دوسری قسط کا اجراء کیا جا چکا ہے۔

(جاری ہے)

ترجمان محکمہ ہاؤسنگ کے مطابق پروگرام میں زیادہ سے زیادہ خاندانوں کو شامل کرنے کے لیے آگاہی مہمات تیز کی جائیں گی اور اس مقصد کے لیے پبلک و پرائیویٹ اداروں سے روابط بڑھائے جائیں گے۔

درخواست جمع کروانے کا طریقہ کار انتہائی آسان اور مکمل طور پر آن لائن رکھا گیا ہے۔ اجلاس میں اخوت، بینک آف پنجاب، این آر سی پی اور آر سی ڈی پی کے نمائندے بھی شریک ہوئے۔ مزید برآں وزیراعلیٰ پنجاب مریم نوازشریف کی زیر صدارت خصوصی اجلاس منعقد ہوا جس میں صاف پانی، واٹر فلٹریشن پلانٹ اور دیگر ترقیاتی امور کا جائزہ لیا گیا۔ وزیراعلیٰ مریم نوازشریف کواجلاس میں مثالی گاؤں پراجیکٹ کے بارے میں تفصیلی بریفنگ پیش کی گئی۔

اجلاس میں لاہور ڈویلپمنٹ پراجیکٹ اور پنجاب ڈویلپمنٹ پراجیکٹ پر پیشرفت کا جائزہ لیا گیا۔ اس موقع پر دور دراز علاقوں کے لئے واٹر پمپ لگانے کی تجویز کا بھی جائزہ لیا گیا۔ وزیراعلیٰ مریم نوازشریف نے واٹر فلٹریشن پلانٹ کے حوالے سے 30 جون 2026ء کی ڈیڈ لائن دے دی ہے۔ وزیراعلیٰ مریم نوازشریف نے لاہور ڈویلپمنٹ پراجیکٹ میں سٹریٹس کی تعمیر و مرمت جلد مکمل کرنے پر زور دیا ہے اور بعض پراجیکٹ کی تکمیل بروقت نہ ہونے پر نا پسندیدگی کا اظہار کیا ہے۔

وزیراعلیٰ مریم نوازشریف نے پنجاب کے ہر شہر میں بیوٹیفکیشن کے 122منصوبوں کا بھی جائزہ لیا۔ لاہور ڈویژن میں 51،راولپنڈی میں 64، فیصل آبادمیں 37، ملتان میں بیوٹیفکیشن کے 75منصوبے مکمل کئے جائیں گے۔ سرگودھا45، گوجرانوالہ 64،ڈی جی خان 51،بہاولپور 61، گجرات 53 اور ساہیوال میں 49منصوبے مکمل کئے جائیں گے۔ وزیراعلیٰ مریم نواز شریف نے بیوٹیفکیشن کے تمام منصوبوں کی بروقت تکمیل یقینی بنانے کی ہدایت کی۔ وزیراعلیٰ مریم نواز شریف نے کہا کہ پینے کے پانی کی عدم دستیابی کی عوامی شکایات کا ازالہ کیا جائے گا۔ واٹر فلٹریشن پلانٹ کی تعمیر و مرمت اور بحالی کے لئے باقاعدہ سسٹم وضع کیا جائے۔ ترقیاتی منصوبوں کی ٹائم لائن اور تعمیراتی معیار کو مد نظر رکھنابے حد ضروری ہے۔