خیبرپختونخواہ حکومت نے اتنہائی حساس علاقوں سے 5 ہزار افراد کو ریسکیو کر لیا

خیبرپختونخواہ میں بادل پھٹنے اور سیلاب کی وجہ سے خوفناک تباہی ہونے کے بعد متاثرہ اضلاع میں موسم خراب ہونے کے باوجود امدادی کاموں کا سلسلہ جاری، دیگر اضلاع میں پیشگی انتظامات بھی شروع کر دیے گئے

محمد علی جمعہ 15 اگست 2025 20:55

پشاور (اُردو پوائنٹ اخبارتازہ ترین۔ 15 اگست2025ء) خیبرپختونخواہ حکومت نے اتنہائی حساس علاقوں سے 5 ہزار افراد کو ریسکیو کر لیا، خیبرپختونخواہ میں بادل پھٹنے اور سیلاب کی وجہ سے خوفناک تباہی ہونے کے بعد متاثرہ اضلاع میں موسم خراب ہونے کے باوجود امدادی کاموں کا سلسلہ جاری، دیگر اضلاع میں پیشگی انتظامات بھی شروع کر دیے گئے۔ تفصیلات کے مطابق خیبرپختوںخواہ میں سیلابی صورتحال کے باعث ہونے والی خوفناک اور تباہ کن صورتحال کے باعث صوبائی حکومت کو ریسکیو آپریشنز کے سلسلے میں شدید مشکلات کا سامنا ہے، اس صورتحال میں وزیر اعلٰی خیبرپختونخواہ علی امین گنڈاپور نے اپنا دوسرا ہیلی کاپٹر بھی ریسکیو آپریشنز کیلئے وقف کر دیا ہے، اس سے قبل باجوڑ میں صوبائی حکومت کا ہیلی کاپٹر حادثے میں تباہ ہو گیا تھا جس میں 5 افراد شہید ہوئے۔

(جاری ہے)

پی ڈی ایم اے کے مطابق خیبر پختونخوا کے ضلع باجوڑ سمیت دیگر علاقوں میں لینڈ سلائیڈنگ اور سیلابی ریلے کے باعث 204 افراد جاں بحق اور33 تاحال لاپتا ہیں۔ پی ڈی ایم اے کی جانب سے گزشتہ 24 گھنٹوں كے دوران ہونے والی بارشوں اور فلش فلڈ کے باعث صوبہ کے مختلف اضلاع میں جانی و مالی نقصانات کی ابتدائی رپورٹ جاری کر دی گئی۔ ترجمان پی ڈی ایم اے کے مطابق گزشتہ 24 گھنٹوں کے دوران ہونے والی بارشوں اور فلش فلڈ کے باعث مختلف حادثات میں اب تک 205 افراد جاں بحق جبکہ 33 لاپتا اور 15 زخمی ہوئے۔

جاں بحق افراد میں 128 مرد، 9 خواتین اور13 بچے شامل جبکہ زخمیوں میں 12 مرد، 2 خواتین اور1 بچہ شامل ہے۔ بارشوں اور فلش فلڈ کے باعث اب تک کی رپورٹ کے مطابق مجموعی طور پر 35 گھر وں کو نقصان پہنچا۔ جس میں 28 گھروں کو جزوی اور 7 گھر مکمل منہدم ہوئے۔ حادثات صوبہ کے مختلف اضلاع سوات، بونیر، باجوڑ، تورغر، مانسہرہ، شانگلہ اور بٹگرام میں پیش آئے۔ تیز بارشوں اور فلش فلڈ كے باعث سب سے زیادہ متاثرہ اضلاع باجوڑ اور بٹگرام ہیں جہاں ریسکیو آپریشن تاحال جاری ہے۔