غزہ: خطرناک حالات میں انسانی خدمت کی اخلاقی ذمہ داری نبھاتے ڈاکٹر کی کہانی

اسلام آباد (اُردو پوائنٹ ۔ UN اردو۔ 15 اگست 2025ء) ستر سالہ ڈاکٹر یونس عوض اللہ ماہر امراض بچگان ہیں جو ریٹائرمنٹ ترک کر کے غزہ میں بیمار اور زخمی بچوں کا علاج کر رہے ہیں۔ وہ اس کام کو اپنے پیشے، غزہ کے بچوں اور اقوام متحدہ کے ادارہ برائے اطفال (یونیسف) کے ساتھ اپنی وفاداری کا پیغام قرار دیتے ہیں۔

ڈاکٹر یونس اپنے 43 سالہ کیریئر میں سعودی عرب، فلسطینی وزارت صحت اور یونیسف کے ساتھ کام کرتے رہے ہیں۔

وہ کہتے ہیں کہ جنگ میں لوگوں کی تکالیف کو دیکھتے ہوئے انہیں ذمہ داری اور وابستگی کا احساس ہوا اور انہوں نے سوچا کہ ان کا طویل عملی تجربہ اس مشکل وقت میں لوگوں کے کام آ سکتا ہے۔

(جاری ہے)

غزہ کے لیے خاموش خطرہ

ڈاکٹر یونس کی داستان 19 اگست کو منائے جانے والے امدادی کارکنوں کے عالمی دن پر یونیسف کی جاری کردہ فلم 'غزہ کے لیے خاموش خطرہ' میں بھی بیان کی گئی ہے۔

غزہ میں بچوں کو حفاظتی ٹیکے لگانے کی بہادرانہ مہم پر مئی میں ڈاکٹر یونس کا نام ٹائم میگزین کی جانب سے 100 نمایاں ترین ڈاکٹروں کی فہرست میں درج کیا گیا تھا۔ وہ یونیسف کی 32 منٹ پر مشتمل فلم میں مرکزی شخصیت کے طور پر نظر آتے ہیں۔

انتھک اور بے لوث خدمات

یونیسف نے کہا ہے کہ دونوں معالجین کی جرات اس بنیادی حقیقت کو واضح کرتی ہے کہ جب امدادی اصولوں کی پاسداری کی جائے، امدادی کارکنوں کو تحفظ اور محفوظ و بروقت رسائی ملے تو انتہائی مشکل حالات میں بھی زندگیوں کو تحفظ دیا جا سکتا ہے۔

ڈاکٹر یونس نے یو این نیوز کو بتایا کہ فضا اور سمندر سے برستے بموں تلے کیسے تھکاوٹ، بھوک اور خوف ان کے روزمرہ معمول کا حصہ بن گئے تھے۔ تاہم انہوں نے ہر بچے کو ویکسین دینا اپنی ترجیح بنایا۔ وہ یاد کرتے ہیں کہ اس دوران ان کے ساتھ تھکاوٹ سے نڈھال ہو جاتے تھے لیکن جلد ہی دوبارہ کام پر واپس آ جاتے۔

قوت ارادی کی زندہ گواہی

ڈاکٹر یونس ویکسین لینے والے بچے کی مسکراہٹ سے لے کر طبی ٹیموں کی جانب سے خطروں اور مشکلات کی پروا نہ کرتے ہوئے دور دراز علاقوں میں جانے پر اصرار تک بہت سے واقعات سناتے ہوئے کہتے ہیں کہ امدادی کام ہر عمر میں اور ہر طرح کے حالات میں جاری رہتا ہے۔

ان کا کہنا ہے کہ وہ امدادی کام کرتے ہیں اور ان کی ریٹائرمنٹ کا اطلاق اس کام پر نہیں ہوتا۔

'غزہ کے لیے خاموش خطرہ' محض فلم یا واقعات کا بیان نہیں بلکہ عزم اور امید کی طاقت کی جیتی جاگتی گواہی ہے۔

ڈاکٹر یونس سمجھتے ہیں کہ فلم کا ہر منظر دنیا کے لیے پیغام ہے کہ زخموں، موت اور مشکل زندگی کے باوجود غزہ اپنے بچوں کو تحفظ دینے کے قابل ہے۔ وہ اور ان کے ساتھ امدادی کارکن اپنی جان کو لاحق خطرات کے باوجود متواتر بمباری تلے اپنا کام کیے جا رہے ہیں۔

UNICEF

تحفظ کی ضرورت

ان کا کہنا ہے کہ انہیں کوئی خوف محسوس نہیں ہوتا۔

انہوں نے بتایا کہ غزہ میں 350 طبی اہلکار ہلاک، سیکڑوں زخمی اور 1,300 گرفتار ہو چکے ہیں۔

انہوں دنیا سے اپیل کی ہے کہ لوگوں کو مدد پہنچانے والوں کو تحفظ دینا انہیں تعیش کی فراہمی نہیں بلکہ اس بات کو یقینی بنانا ہے کہ ضرورت مند لوگوں کی زندگی اور امید قائم رہے۔

امید پھیلانے کا کام

ڈاکٹر یونس کا کہنا ہے کہ دہائیوں کے تجربے سے انہوں نے یہ سیکھا ہے کہ انسان بہت مضبوط ہوتے ہیں۔ مضبوطی درد اور تکلیف محسوس ہونے کا نام نہیں بلکہ اس کا مطلب المیوں کے باوجود خود کو قائم رکھنا اور مشکلات کا مقابلہ کرنا ہے۔

وہ ماؤں کو شدید تکالیف کے عالم میں اپنے بچوں کے ساتھ ہنستا اور مریضوں کو مسکراہٹ اور امید کے ساتھ مشکلات جھیلتا دیکھ چکے ہیں۔

ان کا کہنا ہے کہ امدادی کارکن کی حیثیت سے ان کا کام لوگوں کو علاج اور مادی مدد کی فراہمی سے کہیں بڑھ کر ہے۔ وہ لوگوں کے دلوں میں امید جگاتے ہیں، انہیں نفسیاتی مدد فراہم کرتے ہیں اور مشکلات کا مضبوطی سے سامنا کرنے کی ہمت دلاتے ہیں۔

اخلاقی و امدادی فریضہ

امدادی کارکنوں کے عالمی دن پر ڈاکٹر یونس ان تمام لوگوں کو خراج تحسین پیش کرتے ہیں جنہوں نے خطرات سے دور جانے کے بجائے لوگوں کو مدد پہنچانے کی خاطر ان کا سامنا کرنے کا فیصلہ کیا۔

غزہ سمیت ہر جگہ امدادی کارکن اس بات کی گواہی ہیں کہ ہمدردی کی کوئی حدود نہیں ہوتیں اور انسانی یکجہتی دوران جنگ یا ملبے پر بھی فروغ پا سکتی ہے۔

ڈاکٹر یونس کو امید ہے کہ وہ بہت جلد اپنے خاندان سے دوبارہ ملیں گے۔ وہ پیغام دیتے ہیں کہ امدادی کام محض پیشہ نہیں بلکہ اخلاقی اور امدادی فریضہ بھی ہے۔ انہوں نے دو سال سے اپنے اہلخانہ کو نہیں دیکھا کیونکہ وہ اس کام پر یقین رکھتے ہیں۔