افغان مہاجرین ڈے کے حوالے سے پشاو میں خواتین تائیکوانڈو مقابلوں کا انعقاد

ہفتہ 21 جون 2025 21:39

پشاور(اُردو پوائنٹ اخبارتازہ ترین - آن لائن۔ 21 جون2025ء) افغان مہاجرین ڈے کے حوالے سے حیات آباد اسپورٹس کمپلیکس پشاور میں خصوصی ویمن تائیکوانڈو مقابلوں کا انعقاد کیا گیا، جس میں افغان پناہ گزین اور مقامی خواتین کھلاڑیوں کی بڑی تعداد نے حصہ لیا اور اپنی صلاحیتوں کا بھرپور مظاہرہ کر کے شائقین سے خوب داد وصول کی۔ ایونٹ کا مقصد پاکستان میں مقیم افغان خواتین کو کھیلوں کے ذریعے مثبت سرگرمیوں کی طرف راغب کرنا اور مقامی کھلاڑیوں کے ساتھ دوستی اور ہم آہنگی کو فروغ دینا تھا۔

اس مقابلے میں حصہ لینے والی کھلاڑیوں نے اعلی معیار کی مہارت، پھرتی اور تکنیک کا عملی مظاہرہ کیا، جو اس بات کی عکاسی تھی کہ خیبر پختونخوا میں خواتین مارشل آرٹس کھیلوں کی طرف بھرپور رجحان رکھتی ہیں۔

(جاری ہے)

تقریب کے مہمانِ خصوصی افغان کمشنر شکیل محمدخان صافی تھے، جنہوں نے کھلاڑیوں کے حوصلے اور جذبے کو سراہا۔اس موقع پر احسان اللہ خان، ڈائریکٹرزفضل ربی اور طاہرخان ،صوبائی تائیکوانڈو ایسو سی ایشن کے چیئرمین الیاس افریدی اور تائیکوانڈو کیکوالیفائڈ کوچ محمد راجہ سمیت دیگر شخصیات بھی موجودتھے۔

تقریب سے خطاب کرتے ہوئے افغان کمشنر شکیل محمد خان صافی کا کہنا تھا کہ افغان اور پاکستانی خواتین کھلاڑیوں کا اس پلیٹ فارم پر اکٹھا ہونا خوش آئند ہیاور ایسے مقابلے دونوں قوموں کے درمیان تعلقات کو مضبوط بنانے کا ذریعہ بن سکتے ہیں۔ ایونٹ میں معروف کوچز، تائیکوانڈو ایسوسی ایشن کے عہدیداران اور مقامی شائقینِ کھیل بھی بڑی تعداد میں شریک تھے۔

احسان اللہ سمیت دیگر اہم شخصیات نے بھی اپنی موجودگی سے تقریب کی رونق کو دوبالا کیا۔ تقریب کے اختتام پر نمایاں کارکردگی دکھانے والی کھلاڑیوں میں انعامات اور اسناد تقسیم کی گئیں۔ منتظمین کا کہنا تھا کہ اس طرح کے مزید مقابلوں کا انعقاد آئندہ بھی کیا جائے گا تاکہ خواتین کھلاڑیوں کو آگے بڑھنے کے مزید مواقع میسر آئیں۔ایونٹ نے نہ صرف کھیلوں کی دنیا میں خواتین کی اہمیت کو اجاگر کیا بلکہ افغان پناہ گزین کمیونٹی کو پاکستانی معاشرے کا فعال حصہ بنانے کی جانب ایک مثبت قدم بھی ثابت ہوا۔