ًیران سے بجلی کی فراہمی معطل ، بلوچستان کے مکران ڈویڑن کو قومی گرڈ سے منسلک کردیا گیا

ایران سے بجلی کی بحالی کے لیے ایرانی حکام سے رابطے جاری ہیں، توقع ہے کہ جلد ہی سرحد پار سے بجلی کی فراہمی دوبارہ شروع ہوجائے گی،ترجمان کیسکو

پیر 23 جون 2025 21:30

] کوئٹہ(اُردو پوائنٹ اخبارتازہ ترین - آن لائن۔ 23 جون2025ء)یران سے بجلی کی فراہمی معطل ہونے کے بعد بلوچستان کے مکران ڈویڑن کو قومی گرڈ سے منسلک کردیا گیا ہے، جس کے نتیجے میں علاقے میں بجلی کی فراہمی مرحلہ وار بحال ہونا شروع ہو گئی ہے۔بلوچستان کا مکران ڈویڑن، جس میں گوادر، کیچ (تربت)، پنجگور، پسنی، اورماڑہ اور ہوشاب جیسے اضلاع شامل ہیں، ایران سے درآمد کی جانے والی بجلی پر انحصار کررہے تھے، ایران سے تقریباً 200 میگاواٹ بجلی ان علاقوں کو فراہم کی جاتی تھی، جو اکثر سرحد پار فنی خرابی یا دیگر وجوہات کی بنا پر متاثر ہوتی رہی ہے۔

پیر کے روز دوپہر 12 بجے ایران سے بجلی کی فراہمی اچانک منقطع ہو گئی، جس کے باعث مکران کے تمام اضلاع تاریکی میں ڈوب گئے۔کوئٹہ الیکٹرک سپلائی کمپنی (کیسکو) کے ترجمان کے مطابق، ہنگامی بنیادوں پر اقدامات کرتے ہوئے ان علاقوں کو فوری طور پر نیشنل گرڈ سے منسلک کردیا گیا۔

(جاری ہے)

اس عمل کے تحت گوادر، پنجگور، تربت، پسنی، ہوشاب اور اورماڑہ میں بجلی کی فراہمی مرحلہ وار بحال کردی گئی۔

ترجمان کیسکو نے بتایا کہ ایران سے بجلی کی بحالی کے لیے ایرانی حکام سے رابطے جاری ہیں۔ توقع ہے کہ جلد ہی سرحد پار سے بجلی کی فراہمی دوبارہ شروع ہوجائے گی۔یاد رہے کہ بلوچستان کا ساحلی علاقہ ماضی میں انفراسٹرکچر کی کمی اور نیشنل گرڈ سے عدم ربط کے باعث بجلی کی شدید قلت کا شکار رہا ہے۔ ایران کے ساتھ بجلی کی درآمدی معاہدے کے تحت مکران کو نسبتاً بہتر فراہمی حاصل ہوئی، لیکن بارہا یہ نظام غیر یقینی حالات کا شکار رہا۔حکومت کی جانب سے مکران کو قومی گرڈ سے مستقل طور پر جوڑنے کے منصوبے کئی سال سے زیر غور تھے اور حالیہ پیش رفت اس جانب ایک اہم قدم سمجھی جا رہی ہے۔