بجلی کے بنیادی ٹیرف میں 1 روپے 50 پیسے فی یونٹ کمی کی منظوری

ٹیرف میں یہ کمی حکومت کی جانب سے دی جانے والی سبسڈی کے فیصلے سے مشروط ہوگی

ساجد علی بدھ 25 جون 2025 11:06

بجلی کے بنیادی ٹیرف میں 1 روپے 50 پیسے فی یونٹ کمی کی منظوری

اسلام آباد ( اُردو پوائنٹ اخبارتازہ ترین۔ 25 جون 2025ء ) بجلی کے بنیادی اوسط ٹیرف میں 1 روپے 50 پیسے فی یونٹ کمی کی منظوری دے دی گئی۔ تفصیلات کے مطابق نیپرا نے آئندہ مالی سال کیلئے بجلی کا بنیادی ٹیرف 34 روپے فی یونٹ تجویز کیا، ٹیرف میں یہ کمی حکومت کی جانب سے دی جانے والی سبسڈی کے فیصلے سے مشروط ہے، رواں مالی سال بجلی کا بنیادی ٹیرف 35 روپے 50 پیسے ہے، بجلی تقسیم کار کمپنیوں کی ریونیو ضروریات کیلئے 3 ہزار 520 ارب روپے کی منظوری دی گئی ہے، حکام کا کہنا ہے کہ یہ اقدام عوام پر مالی بوجھ میں کمی لانے کے لیے کیا گیا ہے جب کہ سی پی پی اے نے بجلی 10 پیسے فی یونٹ منہگی کرنےکی درخواست نیپرا میں جمع کرا دی ہے، درخواست پر 30 جون کو سماعت کی جائے گی۔

دوسری طرف لاہور الیکٹرک سپلائی کمپنی (لیسکو) صارفین پر بجلی کے بلوں کی مد میں 8 ارب روپے کا اضافی بوجھ ڈالنے کا فیصلہ کیا گیا ہے، اس ضمن میں نیپرا نے لیسکو کی درخواست پر اضافی قیمت وصول کرنے کی منظوری دے دی، اس حوالے سے لیسکو نے گزشتہ 3 سالہ ایڈجسٹمنٹ کی بنیاد پر نیپرا میں درخواست دائر کی تھی، جس کے تحت لیسکو نے 2019ء سے 2020ء کے دوران کوارٹر ایڈجسٹمنٹ کی بنیاد پر اضافہ مانگا، کمپنی نے 2020ء سے 2021ء کے مالی سال کے دوران بھی ایڈجسٹمنٹ کی بنیاد پر اضافے کا مطالبہ کیا، اسی طرح لیسکو نے 2021ء سے 2022ء کے مالی سال کے دوران بھی ایڈجسٹمنٹ کی بنیاد پر اضافہ مانگا تھا۔

(جاری ہے)

معلوم ہوا ہے کہ نیپرا کی جانب سے لیسکو کی دائر درخواست پر سماعت کرکے اربوں روپے وصول کرنے کی منظوری دیدی گئی، جس کے تحت لیسکو آئندہ مالی سال کے دوران بجلی کے صارفین سے بلز وصول کرے گی، اس مد میں ایک سال کے دوران صارفین کو آٹھ ارب روپے کی اضافی ادائیگیاں کرنا ہوگی۔