ٹوبہ ٹیک سنگھ میں ڈیرے پر فائرنگ، رکن اسمبلی ایوب گادھی زخمی، 3 افراد قتل

ایوب گادھی کو ریسکیو حکام نے فوری طور پر طبی امداد کیلئے ڈسٹرکٹ ہیڈ کوارٹر ہسپتال منتقل کردیا، واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی

ساجد علی پیر 11 مئی 2026 11:21

ٹوبہ ٹیک سنگھ میں ڈیرے پر فائرنگ، رکن اسمبلی ایوب گادھی زخمی، 3 افراد ..

ٹوبہ ٹیک سنگھ (اُردو پوائنٹ اخبارتازہ ترین۔ 11 مئی2026ء) صوبہ پنجاب کے ضلع ٹوبہ ٹیک سنگھ میں رکن پنجاب اسمبلی ایوب گادھی کے ڈیرے پر نامعلوم افراد کی فائرنگ کے نتیجے میں 3 افراد جاں بحق اور ایم پی اے زخمی ہو گئے، واقعے کے بعد علاقے میں خوف و ہراس پھیل گیا، پولیس نے تحقیقات کا آغاز کردیا۔ اطلاعات کے مطابق یہ افسوسناک واقعہ رجانہ میں پیش آیا جہاں نامعلوم مسلح افراد نے ایوب گادھی کے ڈیرے کو نشانہ بنایا، پنجاب اسمبلی کے رکن ایوب گادھی کے ڈیرے پر مسلح افراد نے اندھا دھند فائرنگ کردی، جس کے نتیجے میں 3 قیمتی جانیں ضائع ہو گئیں، اس واقعے میں ایم پی اے ایوب گادھی خود بھی زخمی ہوئے، فائرنگ اتنی شدید تھی کہ وہاں موجود ایوب گادھی کے 3 ساتھی موقع پر ہی جاں بحق ہوگئے۔

بتایا گیا ہے کہ حملے میں ایوب گادھی زخمی ہوئے، جنہیں ریسکیو حکام نے فوری طور پر طبی امداد کے لیے ڈسٹرکٹ ہیڈ کوارٹر ہسپتال منتقل کردیا، واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کی ناکہ بندی کرکے ملزمان کی تلاش شروع کردی، انسپکٹر جنرل آف پولیس عبدالکریم نے واقعے کا سخت نوٹس لیتے ہوئے آر پی او فیصل آباد سے فوری رپورٹ طلب کرلی۔

(جاری ہے)

معلوم ہوا ہے کہ اس حملے کے بعد ٹوبہ ٹیک سنگھ اور گردونواح میں سکیورٹی ہائی الرٹ کر دی گئی ہے، مقامی لوگوں اور سیاسی کارکنوں کی بڑی تعداد ہسپتال کے باہر جمع ہے، جہاں فضا سوگوار ہے، جب کہ اس قاتلانہ حملے پر پولیس حکام کا کہنا ہے کہ پولیس کی جانب سے واقعے کے تمام محرکات کا جائزہ لیا جا رہا ہے اور ملزمان کو جلد از جلد قانون کے کٹہرے میں لایا جائے گا۔