Live Updates

خطے کے مختلف ممالک میں پٹرول کی قیمتیں پاکستان کے مقابلے میں نسبتا کم

سری لنکا میں370روپے فی لیٹر،چین میں 360روپے ،بھارت میں302 روپے جبکہ بنگلہ دیش میں فی لیٹرپیٹرول کی قیمت 288روپے ہے، رپورٹ

اتوار 10 مئی 2026 21:45

کراچی(اُردو پوائنٹ اخبارتازہ ترین - این این آئی۔ 10 مئی2026ء) خطے کے مختلف ممالک میں پٹرول کی قیمتیں پاکستان کے مقابلے میں نسبتا کم ہیں۔سری لنکا میں پٹرول تقریبا 370 روپے فی لیٹر،چین میں تقریبا 360 روپے فی لیٹر،بھارت میں تقریبا 302 روپے فی لیٹرجبکہ بنگلہ دیش میں تقریبا 288 روپے فی لیٹرہے۔رپورٹ میں بتایا گیا ہے کہ افغانستان اور مالدیپ میں بھی پٹرول کی قیمتیں پاکستان کے مقابلے میں کم ہیں، جبکہ ایران میں مقامی سطح پر پیدا ہونے والا پٹرول انتہائی کم قیمت، یعنی تقریبا 6 روپے فی لیٹر میں دستیاب ہے۔

ماہرین کے مطابق پاکستان میں پٹرولیم مصنوعات کی قیمتوں میں مسلسل اضافہ نہ صرف ٹرانسپورٹ کے اخراجات بڑھا رہا ہے بلکہ اشیائے خورونوش سمیت دیگر بنیادی ضروریاتِ زندگی کی قیمتوں پر بھی براہِ راست اثر ڈال رہا ہے۔

(جاری ہے)

عوامی و سماجی حلقوں نے کہاکہ توانائی بحران اور عالمی صورتحال کے تناظر میں حکومت کو طویل المدتی اور مستحکم پالیسی اختیار کرنی چاہیے تاکہ عوام کو مسلسل بڑھتی ہوئی مہنگائی سے ریلیف فراہم کیا جا سکے۔

واضح رہے کہ حکومت نے رواں ہفتے ایک بار پھر پٹرولیم مصنوعات کی قیمتوں میں اضافہ کر دیا ہے، جس کے بعد عوامی سطح پر مہنگائی کے دبا میں مزید اضافہ دیکھنے میں آ رہا ہے۔ خطے میں جاری توانائی بحران اور عالمی سطح پر کشیدگی کے اثرات پاکستان سمیت متعدد ممالک کی معیشتوں پر بھی پڑ رہے ہیں۔حکومتی پالیسی کے مطابق ایران جنگ اور آبنائے ہرمز کی ممکنہ بندش کے باعث پیدا ہونے والے توانائی بحران کے بعد پاکستان میں پٹرولیم قیمتوں کا جائزہ اب 15 روز کے بجائے ہفتہ وار بنیادوں پر لیا جا رہا ہے۔گزشتہ جمعہ کو ہونے والے اضافے کے بعد ملک میں پٹرول کی نئی قیمت 414.78 روپے فی لیٹر تک پہنچ گئی ہے، جس نے عوامی حلقوں میں تشویش اور معاشی دبائو کو مزید بڑھا دیا ہے۔