ہم اپنے شہداء کے احسانات کا بدلہ کبھی نہیں چکا سکتے، فیلڈمارشل

میجر معیز کی عظیم قربانی بہادری، ایثار اور حب الوطنی کی اعلی ترین روایتوں کی مظہر ہے

بدھ 25 جون 2025 13:22

ہم اپنے شہداء کے احسانات کا بدلہ کبھی نہیں چکا سکتے، فیلڈمارشل

راولپنڈی (اُردو پوائنٹ اخبارتازہ ترین - این این آئی۔ 25 جون2025ء)چیف آف آرمی اسٹاف فیلڈ مارشل عاصم منیر نے کہا ہے کہ ہم اپنے شہدا کے احسانات کا بدلہ کبھی نہیں چکا سکتے، ہمارے شہدا کا خون ہماری قومی قوت کی بنیاد ہے۔پاک فوج کے شعبہ تعلقات عامہ (آئی ایس پی آر)کی جانب سے جاری بیان میں بتایا گیا کہ شہید میجر سید معیز عباس شاہ کی نماز جنازہ راولپنڈی میں ادا کی گئی، انہوں نے جنوبی وزیرستان کے علاقے سرا روغہ میں بھارتی سرپرستی میں کام کرنے والے فتنہ الخوارج کے خلاف آپریشن کے دوران شہادت پائی۔

ترجمان پاک فوج کے مطابق میجر سید معیز عباس شاہ(عمر 37سال، ضلع چکوال کے رہائشی)کی نمازِ جنازہ چکلالہ گیریژن، راولپنڈی میں ادا کر دی گئی، نمازِ جنازہ میں چیف آف آرمی اسٹاف فیلڈ مارشل سید عاصم منیر وفاقی وزیر داخلہ، اعلی عسکری و سول حکام، افسران اور جوانوں نے شرکت کی۔

(جاری ہے)

آئی ایس پی آر نے بتایا کہ اس موقع پر فیلڈ مارشل نے شہید کو خراج عقیدت پیش کرتے ہوئے کہا کہ میجر سید معیز عباس شاہ نے دشمن کے خلاف دلیری سے لڑتے ہوئے جان کا نذرانہ پیش کیا، ان کی یہ عظیم قربانی بہادری، ایثار اور حب الوطنی کی اعلی ترین روایتوں کی مظہر ہے۔

ترجمان پاک فوج کے مطابق فیلڈ مارشل نے کہا کہ پوری قوم ان کی شہادت پر غمزدہ بھی ہے اور ان پر فخر بھی کرتی ہے، ہم اپنے شہداء کے احسانات کا بدلہ کبھی نہیں چکا سکتے، ہمارے شہدا کا خون ہماری قومی قوت کی بنیاد ہے۔بیان میں بتایا گیا کہ شہید کی میت ان کے آبائی علاقے روانہ کر دی گئی ہے جہاں انہیں مکمل فوجی اعزاز کے ساتھ سپردِ خاک کیا جائے گا۔