بھارت میں فرانسیسی خاتون کیساتھ جنسی زیادتی، ملزم فرار

ریسٹورنٹ اور ہوٹل سے حاصل فوٹیج سے ملزم تلاش کرنے کی کوشش کر رہے ہیں، پولیس

بدھ 25 جون 2025 22:10

ادے پور (اُردو پوائنٹ اخبارتازہ ترین - این این آئی۔ 25 جون2025ء)بھارتی ریاست راجھستان کے شہر ادے پور میں فرانس سے آئی خاتون جنسی زیادتی کا نشانہ بنادیا گیا۔غیر ملکی میڈیا رپورٹ کے مطابق 30 سالہ فرانسیسی خاتون جو ایک اشتہار کی شوٹنگ کے لیے بھارت کے شہر ادے پور میں موجود تھی اسے ایونٹ مینجمنٹ فرم کے ایک رکن نے پیر کی رات مبینہ طور پر زیادتی کا نشانہ بنایا۔

بھارتی پولیس نے بتایا کہ اشتہار کی شوٹنگ کا انتظام خاتون کی 2 دوستوں نے کیا جو کہ سیاح بھی ہیں اور ایونٹ مینجمنٹ فرم کی ارکان بھی۔پولیس نے مزید بتایا کہ خاتون ایونٹ مینجمنٹ فرم کی ارکان کے ساتھ اتوار کی شام ادے پور کے علاقے بڈگاوں کے ایک ریسٹورنٹ میں گئی جہاں سب نے ایک ساتھ کھانا کھایا۔پولیس نے بتایا کہ ریسٹورنٹ سے واپسی پر ایونٹ مینجمنٹ فرم کا رکن سدھارتھ المعروف پشپا خاتون کو شہر گھمانے کا لالچ دے کر اپنے ہوٹل کے کمرے میں لے گیا اور اس کے ساتھ زیادتی کی۔

(جاری ہے)

پولیس نے بتایا کہ خاتون کا طبی معائنہ کروایا گیا ہے اور ایف آئی آر بھی درج کر لی گئی ہے مگر ملزم تاحال فرار ہے جسے ریسٹورنٹ اور ہوٹل سے حاصل کی گئی فوٹیج سے تلاش کرنے کی کوشش کر رہے ہیں، عینی شاہدین سے بھی پوچھ گچھ کر رہے ہیں جو اس دن ریسٹورنٹ میں موجود تھے۔پولیس نے یہ بھی بتایا کہ فرانسیسی سفارت خانے کو بھی اس واقعے کے بارے میں آگاہ کر دیا گیا ہے۔