پنجاب حکومت کا صوبہ بھر میں شاپس کیلئے یکساں ڈیزائن مقرر کرنے کیلئے بائی لاز اقدامات کا فیصلہ

لاہور ( اردوپوائنٹ اخبار تازہ ترین۔ آئی پی اے ۔ 25 جون 2025ء ) وزیراعلیٰ مریم نواز شریف کی زیر صدارت پنجاب ڈویلپمنٹ پروگرام سے متعلق خصوصی اجلاس منعقد ہوا جس میں پنجاب ڈویلپمنٹ پروگرام کے تحت 189 شہروں کی تعمیر و ترقی کی منظوری دی گئی۔ اجلاس میں پنجاب ڈویلپمنٹ پروگرام کی تکمیل کے لئے پراجیکٹ مینجمنٹ یونٹ بنانے پر اتفاق کیا گیا۔ پنجاب ڈویلپمنٹ پروگرام کے تحت ورلڈ بینک اور ایشین ڈویلپمنٹ بینک کے اشتراک کار سے بھی مختلف شہروں میں تعمیر وترقی کے پراجیکٹ کی تکمیل ہوگی۔

ورلڈ بینک کے پراجیکٹ پی آئی سی پی کے تحت 15شہروں کی تعمیر وترقی ہوگی۔ ایشین ڈویلپمنٹ بینک کے پراجیکٹ ڈریم ٹو کے تحت 4 شہروں کی تعمیر و ترقی ہوگی۔ اے ڈی پی کے تحت 11 شہروں میں ترجیحی طور پرترقیاتی پروگرام مکمل ہوں گے۔

(جاری ہے)

ورلڈ بینک کے پراجیکٹ پی آئی سی پی کے تحت 16 شہروں میں ترقیاتی پروگرام پائے تکمیل تک پہنچائے جائیں گے۔ پنجاب ڈویلپمنٹ پروگرام کے تحت 144 شہروں کو سالانہ ترقیاتی پروگرام میں شامل کیا گیا۔

پنجاب کے 144 شہروں میں پنجاب ڈویلپمنٹ پروگرام کے تحت تعمیر و ترقی کے پراجیکٹس مکمل کیے جائیں گے۔ وزیراعلیٰ مریم نواز شریف نے تمام متعلقہ محکموں کو مکمل اشتراک کار کے ساتھ پراجیکٹ کے تکمیل کی ہدایت کی۔ وزیراعلیٰ مریم  نواز شریف نے صوبہ بھر میں شاپس کے لئے یکساں ڈیزائن مقرر کرنے کے لئے بائی لاز لانے کے لئے اقدامات کا حکم دیا۔ وزیراعلیٰ مریم نواز شریف نے کہا کہ پنجاب ڈویلپمنٹ پروگرام کی تکمیل کے بعد ہر شہر کو جمالیاتی طور پر بہترین نظر آنا چاہیے۔

مزید برآں وزیراعلیٰ پنجاب مریم نواز شریف سے سپیکر پنجاب اسمبلی ملک محمد احمد خان نے ملاقات کی۔ ملاقات میں بجٹ، ترقیاتی پراجیکٹس اور ملکی سیاسی صورتحال پر بات چیت کی گئی۔ وزیراعلیٰ مریم نواز شریف نے بجٹ اجلاس کے کامیاب انعقاد پر سپیکر پنجاب اسمبلی ملک محمد احمد خان کو مبارکباد دی۔ سپیکر پنجاب اسمبلی ملک محمد احمد خان نے عوامی فلاحی بجٹ پیش کرنے پر وزیراعلیٰ مریم نواز شریف کا شکریہ ادا کیا۔

وزیراعلیٰ مریم نواز شریف نے ملاقات کے دوران گفتگو کرتے ہوئے کہا کہ عوامی خدمت، فلاح و بہبود اور گڈ گورننس کے اہداف کو ہر صورت پورا کیا جائے گا۔ بجٹ 2025-26 میں تعلیم، صحت اور ڈویلپمنٹ کے لئے سب سے زیادہ فنڈزمختص کرنے کا ریکارڈ قائم کیا ہے۔ مسلم لیگ (ن) عوام کی جماعت ہے، صوبے بھر میں یکساں ترقیاتی کام کررہے ہیں۔ وزیراعلیٰ مریم نواز شریف نے کہا کہ طلبہ کولیپ ٹاپ اور ہونہار سکالر شپ دیکر احسان نہیں حق ادا کررہے ہیں۔

میری پوری توجہ عوام کی فلاح و بہبود پر ہے۔ ایک سال میں عوام کی بھرپور خدمت کی بہترین کاوش کی ہے،اس سال بھی کوشش جاری رہے گی۔ سپیکر پنجاب اسمبلی ملک محمد احمد خان نے کہا کہ وزیراعلیٰ مریم نواز شریف نے عوامی فلاحی بجٹ دیکر پنجاب کے عوام کے دل جیت لیے ہیں۔ وزیراعلیٰ مریم نواز شریف نے ڈویلپمنٹ پراجیکٹس اور عوامی فلاحی اقدامات کے لئے قائد محمد نواز شریف اور وزیر اعظم شہباز شریف کی روایت کو عمدگی سے آگے بڑھایا ہے۔