سوشل میڈیا پر 1000 روپے کا نوٹ وائرل، اسٹیٹ بینک نے وضاحت جاری کردی

عوام سوشل میڈیا پر گمراہ کن اور غیر مصدقہ مواد سے محتاط رہیں اور تصدیق شدہ ذرائع سے ہی معلومات حاصل کریں؛ بیان

ساجد علی جمعرات 26 جون 2025 14:01

سوشل میڈیا پر 1000 روپے کا نوٹ وائرل، اسٹیٹ بینک نے وضاحت جاری کردی

کراچی ( اُردو پوائنٹ اخبارتازہ ترین۔ 26 جون 2025ء ) اسٹیٹ بینک ف پاکستان نے سوشل میڈیا پر وائرل 1000 روپے کے نوٹ سے متعلق وضاحت جاری کردی۔ تفصیلات کے مطابق سوشل میڈیا پر ان دنوں چند ویڈیوز اور تصاویر زیر گردش ہیں جن میں نیا 1000 روپے کا کرنسی نوٹ دکھایا گیا جس کے بارے میں دعویٰ سامنے آیا کہ یہ اسٹیٹ بینک آف پاکستان کی جانب سے جاری کیا جانے والا 1000روپے کا نیا نوٹ ہے، اسٹیٹ بینک کی جانب سے ان دعوؤں کو مکمل طور پر بے بنیاد قرار دے دیا گیا۔

اس حوالے سے اسٹیٹ بینک آف پاکستان نے بیان جاری کرتے ہوئے واضح کیا ہے کہ سوشل میڈیا پر وائرل ہونے والا نوٹ جعلی ہے اور بینک کی جانب سے ایسا کوئی کرنسی نوٹ جاری نہیں کیا گیا، اگر کوئی نیا کرنسی نوٹ جاری کیا جائے تو اس کا باقاعدہ اعلان کیا جاتا ہے جس کی اطلاع اسٹیٹ بینک کی ویب سائٹ، سوشل میڈیا چینلز اور میڈیا کے ذریعے عوام تک پہنچائی جاتی ہے، اس لیے عوام سوشل میڈیا پر گمراہ کن اور غیر مصدقہ مواد سے محتاط رہیں اور تصدیق شدہ ذرائع سے ہی معلومات حاصل کریں۔

(جاری ہے)

یاد رہے کہ ستمبر 2024ء میں اسٹیٹ بینک نے نئے بینک نوٹ سیریز کے ڈیزائن مقابلے کے نتائج کا اعلان کیا تھا، یہ عمل جنوری 2024ء میں شروع ہوا تھا جس میں مارچ 2024ء میں ایک آرٹ مقابلہ بھی منعقد کیا گیا تاکہ بینک نوٹوں کے لیے جدید اور موضوعاتی ڈیزائن حاصل کیے جا سکیں، تاہم اسٹیٹ بینک کے گورنر جمیل احمد نے رواں سال واضح کیا تھا کہ نئے ڈیزائن کے کرنسی نوٹ جولائی 2025 سے جون 2026 کے مالی سال سے قبل مارکیٹ میں نہیں آئیں گے بلکہ پہلا نیا بینک نوٹ 2025ء کی دوسری ششماہی میں جاری کیا جائے گا اور تمام موجودہ نوٹوں کو بتدریج تبدیل کیا جائے گا۔