پنجاب کے تمام دریاؤں میں پانی کا بہاؤ معمول کے مطابق ہے‘خواجہ سلمان رفیق

جمعرات 26 جون 2025 17:43

لاہور (اُردو پوائنٹ اخبارتازہ ترین - این این آئی۔ 26 جون2025ء) صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے پی ڈی ایم اے ہیڈ آفس کا دورہ کیا۔خواجہ سلمان رفیق نے موسمی صورتحال اور مون سون بارشوں کا جائزہ لیا۔اس موقع پرصوبہ بھر میں ڈی واٹرنگ کی سرگرمیوں کا بھی جائزہ لیا گیا۔ایڈیشنل ڈی جی پی ڈی ایم اے سید جواد حیدر نے صوبائی وزیر کو مون سون بارشوں بارے بریفنگ میں بتایاکہ رواں سال مون سون بارشیں معمول سے 25 فیصد زیادہ ہونے کی پیشگوئی ہے۔

صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے کہاکہ وزیر اعلیٰ پنجاب مریم نواز شریف کی ہدایات کے مطابق پنجاب بھر کے ندی نالوں کی صفائی ستھرائی کو یقینی بنایا جا رہا ہے۔

(جاری ہے)

مون سون بارشوں کا یہ سپیل یکم جولائی تک جاری رہنے کی پیشگوئی ہے۔ خواجہ سلمان رفیق نے کہاکہ پی ڈی ایم اے کنٹرول روم و صوبائی ایمرجنسی آپریشن سینٹرز الرٹ ہیں۔

شہریوں کے تحفظ کیلئے تمام تر وسائل بروئے کار لائے جائیں گے۔واسا سمیت تمام ادارے الرٹ رہیں اور نشیبی علاقوں سے نکاسی آب کو یقینی بنائیں۔پنجاب کے تمام دریاؤں میں پانی کا بہاؤ معمول کے مطابق ہے۔ صوبائی وزیرخواجہ سلمان رفیق نے ممکنہ مون سون بارشوں کے باعث اربن فلڈنگ بارے انتظامات کا بھی جائزہ لیا ۔