پاکستان کیمیکل ایکسپو میں سرسید یونیورسٹی کا اسٹال شہریوں، ماہرین اور طلبہ کی توجہ کا مرکز

جمعرات 26 جون 2025 20:00

کراچی (اُردو پوائنٹ اخبارتازہ ترین - اے پی پی۔ 26 جون2025ء) کراچی ایکسپو سینٹر میں جاری دو روزہ پاکستان کیمیکل ایکسپو 2025میں سرسید یونیورسٹی آف انجینئرنگ اینڈ ٹیکنالوجی کا اسٹال شہریوں، ماہرین، صنعت کاروں اور طلبہ کی توجہ کا مرکز بنا رہا۔جمعرات کو جاری اعلامیہ کے مطابق سرسید یونیورسٹی کے باصلاحیت طلبہ کی جانب سے تیار کیے گئے جدید سائنسی اور تخلیقی پروجیکٹس نے نمائش میں شریک افراد کو بے حد متاثر کیا جن میں ماحول دوست سینٹرل مینجمنٹ سسٹم، جدید ڈیوائسسز اور صنعتی استعمال کے قابل ٹیکنالوجیکل حل شامل تھے۔

سرسیدیونیورسٹی کے چانسلر اکبر علی خان نے مسز ارم اکبر علی خان، ڈاکٹر جعفر نذیر عثمانی اور رجسٹرار سید سرفراز علی کے ہمراہ نمائش کے پہلے روز اسٹال کا دورہ کیا اور طلبہ کی تخلیقی صلاحیتوں اور تحقیقی سرگرمیوں کو سراہا۔

(جاری ہے)

اس موقع پر سرسید یونیورسٹی کے چانسلر محمد اکبر علی خان نے پاکستان کیمیکل مینوفیکچرز ایسوسی ایشن کے چیئرمین ہارون علی خان کو سرسید یونیورسٹی کا نشان پیش کیا۔

اس موقع پر ہارون علی خان نے کہا کہ جدید کیمیکلز کی تحقیق کے ذریعے صنعت کی ترقی کے نئے راستے کھلتے ہیں۔چانسلر اکبر علی خان نے کہا کہ یہ خوش آئند بات ہے کہ ہمارے طلبہ نے علمی سرگرمیوں کے ساتھ ساتھ عملی پروجیکٹس میں بھی غیر معمولی صلاحیتوں کا مظاہرہ کیا ہے۔انہوں نے کہاکہ ہمیں اپنے نوجوانوں پر فخر ہے جو اپنے علم اور تخلیقی صلاحیتوں کی بنیاد پرپاکستان کے بہترین مستقبل کی بشارت دے رہے ہیں۔

اس موقع پر یونیورسٹی کے رجسٹرار سید سرفراز علی نے کہا کہ طلبہ کے تیار کردہ پروجیکٹس اس بات کا ثبوت ہیں کہ ہمارے تعلیمی ادارے تحقیق اور اختراع کے میدان میں آگے بڑھ رہے ہیں، ایسی سرگرمیاں نہ صرف طلبہ کے اعتماد میں اضافہ کرتی ہیں بلکہ ان کے لیے مستقبل میں کارآمد مواقع بھی پیدا کرتی ہیں۔انہوں نے کہا کہ سرسید یونیورسٹی ہمیشہ انٹریکٹو اور انڈسٹری لنکڈ لرننگ کو فروغ دیتی رہے گی۔