نریندر مودی صیہونی وزیراعظم نیتن یاہو کی طرح جنگی مجرم ہے ، دونوں کے ہاتھ مسلمانوں کے خون سے رنگے ہوئے ہیں ،ظہران ممدانی

جمعرات 26 جون 2025 20:20

نیویارک (اُردو پوائنٹ اخبارتازہ ترین - اے پی پی۔ 26 جون2025ء) امریکی ریاست نیویارک کے میئر کیلئے جنوبی ایشیاء سے تعلق رکھنے والے مسلم امیدوار میئر ظہران ممدانی نے بھارتی وزیراعظم نریندر مودی کو "گجرات کا قصائی" قرار دیاہے۔کشمیرمیڈیاسروس کے مطابق ایک بریفنگ کے دوران سوالوں کے جواب میں بھارتی ریاست گجرات سے تعلق رکھنے والے ظہران ممدانی نے نریندر مودی کے ساتھ کسی بھی پریس کانفرنس میں شرکت سے واضح طورپر انکار کر دیا۔

انہوں نےکہاکہ نریندر مودی بھارتی ریاست گجرات میں مسلمانوں کی نسل کشی میں ملوث ہیں ۔انہوں نے کہاکہ نریندر مودی نے بطور وزیراعلیٰ گجرات میں مسلمانوں کانام ونشان مٹانے کیلئے قتل عام کروایا۔ظہران ممدانی نے کہاکہ جب وہ دنیا کو یہ حقیقت بتاتے ہیں کہ وہ مسلمان ہیں اور ان کا تعلق گجرات سے ہے تو شدیدحیرانگی کا اظہار کیاجاتاہے۔

(جاری ہے)

انہوں نے کہاکہ نریندر مودی بھی صیہونی وزیراعظم نیتن یاہو کی طرح جنگی مجرم ہے ان دونوں کے ہاتھ مسلمانوں کے خون سے رنگے ہوئے ہیں ۔

ظہران ممدانی نے کہاکہ اگرنیتن یاہونیویارک کے دورے پر آئے تو وہ جنگی مجرم کو عالمی عدالت انصاف کے حکم پر گرفتار کرلیا جائے گا۔ظہران ممدانی کے اس بے باک اور واضح موقف سے اسرائیل اور انڈیا کے سفارتی حلقوں میں طوفان برپا ہے اور سوشل میڈیا پر انکی ویڈیو تیزی سے وائرل ہو رہی ہے ۔واضح رہے کہ نیویارک کے سابق گورنر اینڈریو کومو کی طرف سے ظہران ممدانی سے شکست تسلیم کرنے کے بعد ان کے نیویارک کے میئر بننے کی راہ ہموار ہو گئی ہے۔