آئندہ دو روز کے دوران ملک کے مختلف علاقوں میں بارش کی وجہ سے اربن فلڈنگ، پہاڑی علاقوں میں لینڈ سلائیڈنگ، کمزور انفراسٹرکچر کے نقصان کا خدشہ

جمعرات 26 جون 2025 21:40

اسلام آباد (اُردو پوائنٹ اخبارتازہ ترین - اے پی پی۔ 26 جون2025ء) محکمہ موسمیات نے کہا ہے کہ آئندہ دو روز کے دوران ملک کے مختلف علاقوں میں بارش کی وجہ سے اربن فلڈنگ، پہاڑی علاقوں میں لینڈ سلائیڈنگ، کمزور انفراسٹرکچر کے نقصان کا خدشہ ہے۔ محکمہ موسمیات کی جانب سے جمعرات کو جاری انتباہ کے مطابق جمعرات 26 جون سے ہفتہ 28 جون کے دوران موسلا دھار/شدید موسلادھار بارش کے باعث مری، گلیات، مانسہرہ، کوہستان، دیر، سوات، شانگلہ، نوشہرہ، صوابی، اسلام آباد/راولپنڈی، ڈی جی خان، شمال مشرقی پنجاب اور کشمیر میں مقامی /برساتی ندی نالوں میں طغیانی کا خدشہ ہے۔

اسی طرح جمعہ 27 اور ہفتہ 28 جون کو موسی خیل، بارکھان، خضدار، قلات، دادو اور قمبر شہداد کوٹ میں مقامی / برساتی نالوں میں طغیانی جبکہ شدید بارشوں کے باعث اسلام آباد/راولپنڈی، گوجرانوالہ، لاہور، سیالکوٹ، سرگودھا، فیصل آباد، نوشہرہ، چارسدہ اور پشاور کے نشیبی علاقے زیر آب آنے کا اندیشہ ہے۔

(جاری ہے)

محکمہ موسمیات کے مطابق 27 اور 28 جون کو سکھر، لاڑکانہ، میر پور خاص، حیدرآباد اور کراچی کے نشیبی علاقے بھی زیر آب آنے کا خدشہ ہے جبکہ آندھی/جھکڑ چلنے اور گرج چمک کے باعث روزمرہ کے معمولات متاثر ہونے کے ساتھ ساتھ کمزور انفرا سٹرکچر ( بجلی کے کھمبے، گاڑیوں سولر پینل وغیرہ) کو نقصان کا اندیشہ ہے۔

شدید بارشوں کے باعث خیبر پختونخوا، مری، گلیات، کشمیر میں لینڈ سلائیڈنگ کے باعث ٹریفک کی آمدورفت کے متاثر ہونے کا خطرہ بھی ہے۔