صوبائی حکومت نے محرم الحرام کے دوران امن و امان برقرار رکھنے کیلئے بہترین انتظامات کئےہیں، خیر محمد شیخ

جمعہ 27 جون 2025 17:48

لاڑکانہ (اُردو پوائنٹ اخبارتازہ ترین - اے پی پی۔ 27 جون2025ء) وزیراعلیٰ سندھ کے معاون خصوصی خیر محمد شیخ نے کہا ہے کہ صوبائی حکومت نے محرم الحرام کے دوران امن و امان برقرار رکھنے کیلئے بہترین انتظامات کئے ہیں ۔ان خیالات کا اظہار انہوں نے جمعہ کو کمشنر آفس لاڑکانہ میں منعقدہ ڈویژنل سطح کے اجلاس سے خطاب کرتے ہوئے کیا۔

(جاری ہے)

انہوں نے کہا کہ سندھ حکومت صحت کے شعبے کے لیے زیادہ سے زیادہ کوششیں کر رہی ہے اور اس سلسلے میں ہسپتالوں کے لیے 10 ارب روپے مختص کئے ہیں، جس میں سے 4 ارب روپے ایس آئی یو ٹی کے لیے مختص کئے گئے ہیں اور پیپلز پارٹی کے چیئرمین بلاول بھٹو زرداری، ایم پی اے فریال تالپور اور ایم پی اے جمیل سومرو عوام کو سہولیات فراہم کرنے کے لیے کوشاں ہیں۔

اس موقع پر کمشنر لاڑکانہ ڈویژن طاہر حسین سانگی نے ویڈیو لنک کے ذریعے گفتگو کرتے ہوئے کہا کہ محرم میں امن و امان برقرار رکھنے کیلئے بہترین منصوبہ بندی کی گئی ہے۔ اجلاس میں ڈپٹی کمشنر لاڑکانہ ڈاکٹر شرجیل نور چنا ، ایڈیشنل ڈی آئی جی، میئر لاڑکانہ انور علی لوہر، رینجرز حکام، علمائے کرام اور سول سوسائٹی کے نمائندوں نے شرکت کی۔ملاقات میں تمام علماءکرام نے محرم الحرام کے دوران اپنے بھرپور تعاون کا یقین دلایا۔