Live Updates

ایس ایم ایز کے تاجروں کی عالمی منڈیوں تک رسائی کے لئے ہر ممکن مدد کریں گے، وزیراعلیٰ پنجاب مریم نواز کا مائیکرو سمال اینڈ میڈیم انٹرپرینیورشپ کے عالمی دن پر پیغام

جمعہ 27 جون 2025 22:30

لاہور (اُردو پوائنٹ اخبارتازہ ترین - اے پی پی۔ 27 جون2025ء) وزیراعلی پنجاب مریم نواز نے مائیکرو سمال اینڈ میڈیم انٹرپرینیورشپ کے عالمی دن پر اپنے پیغام میں کہا ہے کہ اس دن کا مقصد چھوٹے اور درمیانے درجے کے کاروباور کو حکومت کی توجہ مرکوز کرنا ہے۔ پنجاب میں چھوٹے اور درمیانے درجے کے کاروبار میں بے پناہ مواقع موجود ہیں۔ ایس ایم ایز کے تاجروں کی عالمی منڈیوں تک رسائی کے لئے ہر ممکن مدد کریں گے۔

حکومت پنجاب آسان کاروبار فنانس اور آسان کاروبار کارڈ کے ذریعے ایس ایم ایز کو سہارا دے رہی ہے۔ انہوں نے کہا کہ حکومت آسان کاروبار کارڈ اور آسان فنانس کے ذریعے 107800افراد کو بزنس کیلئے 75ارب روپے کے قرضے جاری کر چکی۔ آسان کاروبار سکیم کے ذریعے ٹرانسپورٹ سیکٹر اور ہول سیل کے کاروبار کے رجحان میں اضافہ ہورہا ہے۔

(جاری ہے)

لائیو سٹاک، زراعت، دستکاری اور گارمنٹس سمیت ہر شعبے میں ایس ایم ایز کی حوصلہ افزائی کی جارہی ہے۔

چھوٹے کاروباروں میں سرمایہ کاری اقتصادی استحکام اور معاشی خوشحالی کے لیے ضروری ہے۔ چھوٹے کاروبار اور انٹرپرینیورشپ میں جدت کی حوصلہ افزائی اور فروغ کیلئے اقدامات کے عزم کا دن ہے۔وزیراعلی نے کہا کہ انٹرپرینیورشپ کے کلچر کے فروغ کے لیے سازگار ماحول پنجاب حکومت کی ترجیحات میں شامل ہے۔ ایس ایم ایز سے روزگار میں اضافہ کے ساتھ خوشحالی بھی آتی ہے۔

سمال اینڈ میڈیم انٹرپرائزز معیشت کی ریڑھ کی ہڈی ہیں۔ انہوں نے کہا کہ بجٹ میں ٹیکس نہ بڑھا کر ایس ایم ایز کو بہت فائدہ دے رہے ہیں۔ صوبے میں امن وامان کی صورتحال ساز گار ہے، کاروباری سرگرمیوں میں اضافہ ہورہا ہے۔ حکومت چھوٹی انڈسٹریز کو درپیش چیلنجز پر قابوپانے اور ہر ممکن وسائل مہیا کررہی ہے۔ درمیانے درجے کے کاروباروں کیلئے لوجسٹک سپورٹ، ٹیکنالوجی اور منڈیوں تک رسائی بڑھانے پر خصوصی توجہ کی ضرورت ہے۔