سعودی عرب،قتل اور منشیات سمگلنگ کے دومجرموں کے سرقلم

نشہ آور اشیا کی سمگلنگ میں ملوث مجرموں کے لیے موت کی سزا مقرر ہے،وزارت داخلہ

اتوار 29 جون 2025 14:25

مدینہ منورہ (اُردو پوائنٹ اخبارتازہ ترین - این این آئی۔ 29 جون2025ء)سعودی عرب کی وزارت داخلہ نے کہا ہے کہ مدینہ منورہ اور تبوک میں قتل اور منشیات سمگلنگ کے جرائم میں ملوث ایک شہری اورغیرملکی کو سزائے موت دے دی گئی۔عرب ٹی وی کے مطابق سعودی وزارت داخلہ کی جانب سے جاری تفصیلی بیان میں کہا گیا ہے کہ مدینہ منورہ میں سعودی شہری سامر الرفاعی نے اپنے ہم وطن ثامر بن احمد بن عبداللہ السنانی پر تیز دھار آلے سے وار کیا جس سے وہ موقع پر ہلاک ہوگیا۔

ملزم سے تحقیقات کے بعد اسے عدالت کے حوالے کردیا گیا جہاں تمام ثبوت اور اعتراف کے بعد عدالت نے سامر الرفاعی کو مجرم قرار دیتے ہوئے سزائے موت دینے کا فیصلہ جاری کیا۔دوسری جانب وزارت داخلہ کے مطابق تبوک میں مصری شہری علا فتحی عطیہ الحفناوی کو نشہ آور گولیاں مملکت میں سمگل کرنے پر سیکیورٹی اہلکاروں نے گرفتار کیا۔

(جاری ہے)

ملزم کو عدالت میں پیش کیا گیا جہاں شواہد اور اقبال جرم پر عدالت نے مملکت کے قانون کے مطابق اسے سزائے موت کا حکم سنایا۔

وزارت داخلہ کا کہنا تھا کہ سپریم کورٹ نے ابتدائی فیصلہ برقرار رکھا بعدازاں شاہی فرمان جاری ہونے پر گزشتہ روز سزا کا نفاذ کردیا گیا۔سعودی وزارت داخلہ کا کہنا تھا کہ مملکت میں منشیات فروشی سنگین جرم ہے۔ نشہ آور اشیا کی سمگلنگ میں ملوث مجرموں کے لیے موت کی سزا مقرر ہے۔