گورنمنٹ ڈاکٹر فیصل مسعود ٹیچنگ ہسپتال میں 2 جدید ریورس اوسموسس (آر او) واٹر پلانٹس کی تنصیب

اتوار 29 جون 2025 20:50

سرگودھا -29 جون (اے پی پی) (اُردو پوائنٹ اخبارتازہ ترین - اے پی پی۔ 29 جون2025ء) ڈاکٹر فیصل مسعود ٹیچنگ ہسپتال سرگودھا میں شدید گرمی کے پیش نظر مریضوں اور ان کے لواحقین کو صاف اور ٹھنڈے پانی کی سہولت فراہم کرنے کے لیے دو جدید ریورس اوسموسس (آر او) واٹر پلانٹس نصب کر دیے گئے ہیں جن کا باقاعدہ افتتاح کر دیا گیا ہے۔ اس موقع پر میڈیکل سپرنٹنڈنٹ ڈاکٹر سہیل طارق نے کہا کہ ان پلانٹس کی تنصیب کا مقصد مریضوں اور ہسپتال میں آنے والے افراد کو جراثیم سے پاک، محفوظ اور معیاری پانی کی فراہمی ہے تاکہ وہ گرمی سے بچائو کے ساتھ ساتھ پانی سے پھیلنے والی بیماریوں سے بھی محفوظ رہ سکیں۔

آر او پلانٹس ہسپتال کے داخلی راستے اور وارڈز کے قریب لگائے گئے ہیں تاکہ زیادہ سے زیادہ افراد اس سہولت سے استفادہ کر سکیں۔

(جاری ہے)

اس موقع پر ایڈیشنل ایم ایس ڈاکٹر نیئر عباس خان بلوچ۔اے ایم ایس ڈاکٹر طارق محمود۔اے ایم ایس ڈاکٹر کاشفہ بھلی۔ڈاکٹر خواجہ سہیل۔ڈائریکٹر فنانس حسیب احسن۔چیف فارماسسٹ رانا طاہر نوید سمیت دیگر ڈاکٹرز اور پیراء میڈیکل سٹاف نے اس اقدام کو خوش آئند قرار دیتے ہوئے کہا کہ یہ اقدام نہ صرف مریضوں کی بنیادی ضرورت کو پورا کرے گا بلکہ گرمیوں کے دوران ہیٹ اسٹروک، ڈی ہائیڈریشن اور دیگر مسائل سےبچائو میں بھی مددگار ثابت ہوگا۔

واضح رہے کہ حکومت پنجاب کی ہدایت پر تمام بڑے ہسپتالوں میں صاف پانی کی سہولیات کو ترجیحی بنیادوں پر بہتر بنایا جا رہا ہے اور ڈاکٹر فیصل مسعود ٹیچنگ ہسپتال میں آر او پلانٹس کی تنصیب اسی سلسلے کی ایک کڑی ہے۔ہسپتال آنے والے شہریوں نے اس سہولت پر خوشی کا اظہار کرتے ہوئے کہا ہے کہ یہ اقدام حکومت اور ہسپتال انتظامیہ کی عوام دوست سوچ کی عکاسی کرتا ہے۔