محکمہ ہائوسنگ حکام ضروری اقدامات میں تیزی لاکرجاری منصوبوں کو بروقت مکمل کریں،ڈاکٹر امجد علی

پیر 30 جون 2025 18:35

پشاور(اُردو پوائنٹ اخبارتازہ ترین - این این آئی۔ 30 جون2025ء)وزیر اعلیٰ خیبرپختونخوا کے معاون خصوصی برائے محکمہ ہائوسنگ ڈاکٹر امجد علی نے کہا ہے کہ ہاؤسنگ فاؤنڈیشن کی مد میں 88 ہزار سرکاری ملازمین سے درخواستوں کی موصولی خوش آیند ہے،جانج پڑتال کے بعد معیاری درخواست گزاروں کو مختلف ہاوسنگ سکیموں میں پلاٹس دئیے جائینگے۔ ان خیالات کا اظہار انہوں نے گزشتہ روز محکمہ ہاوسنگ کی زیر نگرانی جاری منصوبوں کی موجودہ صورتحال اور درکار اقدامات سے متعلق سول سیکرٹریٹ پشاور میں منعقدہ اجلاس کی صدرات کرتے ہوئے کیا۔

اجلاس میں ڈائریکٹر جنرل پی ایچ اے،ڈپٹی ڈائریکٹر جنرل پی ایچ اے اور ڈائریکٹر ایڈمن کے بشمول دیگر متعلقہ افسران بھی شریک تھے۔ اجلاس میں سی پیک سٹی نوشہرہ, رحمان بابا کمپلیکس, احساس اپنا گھر منصوبہ, ورسک ٹو ہاوسنگ سکیم, جلوزئی, جرما ہاسنگ سکیم کوہاٹ سول کوارٹر پشاور پشاور ویلی اور میگا سٹی نوشہرہ جبکہ باجوڑ میں شراکت داری فارمولا کے تحت 3 ہزار کنال پر مشتمل ہاوسنگ سکیم سے متعلق بھی غور و خوض کیا گیا۔

(جاری ہے)

ڈاکٹر امجد علی نے محکمہ ہائوسنگ کے حکام کو درکار اقدامات میں تیزی لانے کے لئے ہدایات جاری کیں۔ انہوں نے کہا کہ جاری منصوبوں پر کام کا خود جائزہ لینے کیلے وہاں کے دورے کرے گے۔ ڈاکٹر امجد علی کا کہنا تھا کہ معیار و مقدار پر سمجھوتا نہیں کیا جائیگا جبکہ غفلت برتنے والوں کے خلاف کاروائی کریں گے۔