-محرم الحرام میں امن و امان کیلئے لاہور پولیس کا کریک ڈاؤن، 25 علاقوں میں سرچ آپریشنز

پیر 30 جون 2025 21:30

ص*لاہور (اُردو پوائنٹ اخبارتازہ ترین - آن لائن۔ 30 جون2025ء) محرم الحرام کے پرامن انعقاد کے لیے لاہور پولیس کی جانب سے شہر بھر میں سرچ آپریشنز کا سلسلہ جاری ہے۔ڈی آئی جی آپریشنز لاہور فیصل کامران کے مطابق شہر کے 25 مختلف علاقوں میں بڑے پیمانے پر سرچ آپریشنز کیے گئے۔ کارروائیوں کے دوران 758 گھروں اور 2,491 افراد کی جامع جانچ پڑتال کی گئی۔فیصل کامران نے بتایا کہ 360 کرایہ داروں کے کوائف کی مکمل چھان بین کی گئی، جبکہ کرایہ داری ایکٹ کی خلاف ورزی پر 3 افراد کو حراست میں لیا گیا۔

(جاری ہے)

سرچ آپریشنز کے دوران اسلحہ برآمد ہونے پر 2 ملزمان جبکہ منشیات کی برآمدگی پر 5 افراد کو گرفتار کیا گیا۔ مزید برآں، مختلف مقدمات میں مطلوب 2 اشتہاری ملزمان کو بھی قانون کی گرفت میں لایا گیا۔ڈی آئی جی آپریشنز کا کہنا تھا کہ امن و امان قائم رکھنے کے لیے اشتہاری ملزمان کی گرفتاری ناگزیر ہے۔ انسدادی کارروائیوں کے تحت مجموعی طور پر 13 افراد کے خلاف قانونی کارروائیاں عمل میں لائی گئیں۔انہوں نے شہریوں سے اپیل کی کہ وہ کسی بھی مشکوک سرگرمی یا فرد کی فوری اطلاع پولیس ہیلپ لائن 15 پر دیں تاکہ محرم کے دوران امن و سکون کو یقینی بنایا جا سکے۔