مٹی کا تیل کا بھی 15 روپے مہنگا کر دیا گیا

نئے مالی سال کے آغاز پر شہباز حکومت نے پٹرول اور ڈیزل مہنگا کرنے کے بعد عوام کو مہنگائی کا ایک اور تحفہ دے دیا

محمد علی منگل 1 جولائی 2025 19:26

اسلام آباد (اُردو پوائنٹ اخبارتازہ ترین۔ 01 جولائی2025ء) مٹی کا تیل کا بھی 15 روپے مہنگا کر دیا گیا، نئے مالی سال کے آغاز پر شہباز حکومت نے پٹرول اور ڈیزل مہنگا کرنے کے بعد عوام کو مہنگائی کا ایک اور تحفہ دے دیا۔ تفصیلات کے مطابق شہباز شریف کی وفاقی حکومت نے پٹرول اور ہائی اسپیڈ ڈیزل کے بعد مٹی کے تیل کی قیمت میں بھی اضافہ کردیا۔ میڈیا رپورٹ کے مطابق وفاقی حکومت نے پٹرول اور ہائی اسپیڈ ڈیزل کے بعد مٹی کا تیل بھی مہنگا کر دیا ہے، مٹی کے تیل کی قیمت میں 15 روپے 23 پیسے فی لیٹر کا اضافہ کر دیا گیا ہے، جس کا نوٹیفکیشن جاری کر دیا گیا ہے۔

مٹی کے تیل کی نئی قیمت 184 روپے 43 پیسے فی لیٹر مقرر کی گئی ہے، اوگرا نے مٹی کے تیل کی قیمت میں اضافے کا نوٹیفکیشن جاری کردیا، جس کا اطلاق یکم مئی سے ہوگیا۔

(جاری ہے)

اس سے قبل مٹی کے تیل کی قیمت 169 روپے 20 پیسے فی لیٹر تھی، وزارت خزانہ نے رات گئے پیٹرول اور ہائی اسپیڈ ڈیزل کی قیمتوں میں اضافے کا اعلان کیا تھا۔پیٹرول 8 روپے 36 پیسے فی لیٹر مہنگا کیا گیا، ہائی اسپیڈ ڈیزل کی قیمت میں10 روپے 39 پیسے فی لیٹر کا اضافہ کیا گیا تھا، یاد رہے کہ حکومت ہر 15 روز کے بعد پیٹرولیم مصنوعات کی نئی قیمتوں کا تعین کرتی ہے۔