وزیراعلی سندھ مراد علی شاہ سے صوبائی محتسب سہیل راجپوت کی ملاقات

بدھ 2 جولائی 2025 19:38

کراچی(اُردو پوائنٹ اخبارتازہ ترین - این این آئی۔ 02 جولائی2025ء)وزیر اعلی سندھ سید مراد علی شاہ سے صوبائی محتسب سندھ محمد سہیل راجپوت نے ملاقات کی اور سال 2024 کی سالانہ رپورٹ پیش کی جس میں عوامی شکایات کے ازالے اور ادارہ جاتی اصلاحات کے حوالے سے نمایاں پیش رفت کو اجاگر کیا گیا ہے۔رپورٹ کے مطابق سال بھر میں مجموعی طور پر 9,151 نئی شکایات موصول ہوئیں جن میں سے 5,299 کو تحقیقات کے لیے منظور کیا گیا۔

ان میں سے 4,602 شکایات کا ازالہ کیا گیا جبکہ 2,348 کیسز میں متاثرہ افراد کو عملی ریلیف فراہم کیا گیا جس سے مجموعی حل کی شرح 51 فیصد رہی۔اہم پیش رفت میں موبائل ایپ کا اجرا، سرکاری ویب سائٹ کی اپ گریڈیشن، اور شکایات کے انتظام کا نیا نظام شامل ہے جن کا مقصد عوامی رسائی اور کام کی رفتار میں بہتری لانا ہے۔

(جاری ہے)

رپورٹ میں "برانڈ ایمبیسیڈر پروگرام" کا بھی ذکر کیا گیا ہے جو اعلی جامعات کے تعاون سے تیار کیا گیا ہے اور نوجوانوں کو محتسب کے کردار سے آگاہی دینے کے لیے شامل کیا گیا ہے۔

رپورٹ میں پنشنرز کے مسائل، معذور بچوں کے لیے جامع تعلیمی اقدامات اور محکمہ تعلیم، پولیس اور ماحولیاتی تحفظ جیسے کلیدی شعبہ جات کا جائزہ بھی شامل ہے۔ ازخود نوٹس اقدامات، خصوصا ایل پی جی سلنڈر کی حفاظت کے لیے ضوابط سازی، ادارے کی انتظامی انصاف اور عوامی فلاح کے لیے سنجیدگی کو ظاہر کرتے ہیں۔رپورٹ میں عالمی محتسب اداروں کے ساتھ بین الاقوامی تعاون اور عوامی آرا کو بھی شامل کیا گیا ہے جو ادارے کے بڑھتے ہوئے اثرورسوخ اور شفافیت کو نمایاں کرتا ہے۔

رپورٹ کے آخر میں مختلف زبانوں میں عمومی سوالات اور معلوماتی مضامین شامل کیے گئے ہیں جو سندھ میں محتسب کے اہم کردار کو اجاگر کرتے ہیں۔یہ جامع رپورٹ نہ صرف ادارے کی سال بھر کی کامیابیوں کو دستاویزی شکل دیتی ہے بلکہ آئندہ کے لیے عوامی اعتماد اور انتظامی احتساب کو فروغ دینے کا لائحہ عمل بھی پیش کرتی ہے۔ وزیر اعلی سندھ نے بالخصوص کمزور طبقات کی شکایات کے ازالے میں محتسب کی محنت کو سراہا۔