کابینہ کمیٹی برائے امن و امان کی داتا دربار آمد،مزار شریف کے 982ویں غسل مبارک کے انتظامات کا جائزہ لیا

جمعرات 3 جولائی 2025 15:13

لاہور (اُردو پوائنٹ اخبارتازہ ترین - این این آئی۔ 03 جولائی2025ء) چیئرمین کابینہ کمیٹی برائے امن و امان و صوبائی وزیر صحت خواجہ سلمان رفیق کی قیادت میں کابینہ کمیٹی نے داتا دربار لاہور کا دورہ کیا اور حضرت داتا گنج بخش علی ہجویری رحم اللہ کے مزار کے 982ویں غسل مبارک کے انتظامات کا جائزہ لیا۔ صوبائی وزیر بلال یاسین، سیکرٹری داخلہ پنجاب ڈاکٹر احمد جاوید قاضی، سیکرٹری اوقاف ڈاکٹر سید طاہر رضا بخاری، کمشنر لاہور ڈویژن زید بن مقصود، ڈپٹی کمشنر لاہور سید موسی رضا، ڈی آئی جی آپریشنز لاہور فیصل کامران، ڈی آئی جی سی ٹی ڈی عثمان گوندل، ایڈیشنل سیکرٹری داخلی احسان جمالی اور ایڈمنسٹریٹر داتا دربار و دیگر حکام موجود تھے۔

صوبائی وزرا نے 9 محرم الحرام کو حضرت داتا گنج بخش علی ہجویری رحم اللہ کے 982 ویں غسل مبارک کے انتظامات کا جائزہ لیا۔

(جاری ہے)

سیکرٹری اوقاف اور دیگر حکام نے غسل مبارک کے انتظامات کیلئے جائزہ اجلاس میں بریفنگ دی۔ غسل کی تقریب کیلئے سکیورٹی اور دیگر انتظامات مکمل ہیں اور تمام متعلقہ اداروں کی ٹیمیں ڈیوٹی پر تعینات کی جاچکی ہیں۔ صوبائی وزرا نے حضرت داتا گنج بخش علی ہجویری رحم اللہ کے مزار پر حاضری دی اور ملک و قوم کیلئے دعائیں کیں۔

اس موقع پر خواجہ سلمان رفیق نے کہا کہ وزیر اعلی پنجاب کی ہدایت کے مطابق محرم الحرام اور حضرت داتا گنج بخش ہجویری رحم اللہ کے 982 ویں غسل مبارک کے انتظامات مکمل ہیں۔ انہوں نے کہا کہ انتظامیہ کی جانب سے اس سلسلہ میں کیے گئے انتظامات تسلی بخش ہیں۔ حکومت پنجاب نے نائب وزیر اعظم اسحاق ڈار سے غسل مبارک کی مرکزی تقریب میں بطور مہمان خصوصی شرکت کی درخواست کی ہے۔

خواجہ سلمان رفیق نے بتایا کہ غسل مبارک کی تقریب کو سی سی ٹی وی کیمروں سے مانیٹر کیا جائے گا اور تمام متعلقہ اداروں کے افسران کی تعیناتی کی جاچکی ہے۔ صوبائی وزیر بلال یاسین نے کہا کہ محرم الحرام کے دوران حکومت پنجاب نے سکیورٹی کے فول پروف انتظامات کئے ہیں۔ انہوں نے کہا کہ صوبہ بھر میں جاکر حفاظتی انتظامات کا جائزہ لیا اور اب بھی پوری کابینہ فیلڈ میں موجود ہے۔