پی ٹی آئی کی صوبائی حکومت کیخلاف تحریک عدم اعتماد زیر غور نہیں‘رانا ثنا اللہ

پی ٹی آئی چاہتی کہ اسٹیبلشمنٹ اس کو دوبارہ کندھوں پر اٹھا کر اقتدار دے،یہ خواب کبھی پورا نہیں ہوگا’انٹرویو

جمعرات 3 جولائی 2025 16:21

پی ٹی آئی کی صوبائی حکومت کیخلاف تحریک عدم اعتماد زیر غور نہیں‘رانا ..

اسلام آباد(اُردو پوائنٹ اخبارتازہ ترین - این این آئی۔ 03 جولائی2025ء)وزیر اعظم کے مشیر رانا ثنا اللہ نے کہا ہے کہ مولانا فضل الرحمان سے خیبر پختون خوا کی حکومت گرانے کی کسی نے کوئی بات نہیں کی ، پی ٹی آئی کی صوبائی حکومت کے خلاف تحریک عدم اعتماد لانے کا معاملہ زیر غور نہیں ہے۔نجی ٹی وی کے پروگرام میں گفتگو کرتے ہوئے وزیر اعظم کے مشیر رانا ثنا اللہ نے کہا کہ حکومت نے پی ٹی آئی کو مذاکرات کی متعدد بار پیش کش کی لیکن پی ٹی آئی مسلسل مذاکرات سے انکاری رہی۔

انہوں نے کہا کہ پی ٹی آئی 2018 میں اس وقت کی اسٹیبلشمنٹ کی مدد سے اقتدار میں آئی تھی، پی ٹی آئی چاہتی ہے کہ اسٹیبلشمنٹ اس کو دوبارہ کندھوں پر اٹھا کر اقتدار دے، پی ٹی آئی کا یہ خواب کبھی پورا نہیں ہوگا۔

(جاری ہے)

رانا ثنا اللہ کا کہنا تھا کہ پی ٹی آئی والے اپنے فیصلوں اور طرز سیاست کی وجہ سے اس جگہ پر پہنچے ہیں، پی ٹی آئی اپنی صوبائی حکومتیں نہ توڑتی تو شاید 9 مئی بھی نہ ہوتا، وزیراعظم نے پی ٹی آئی کو کہا کہ آپ بھلے میرے پاس نہ آئیں، اسپیکر چیمبر میں بات کرلیں میں وہاں آجاؤں گا، پی ٹی آئی جمہوریت کو ڈائیلاگ سے نہیں، ڈیڈلاک سے چلانا چاہتے ہیں۔

اس کے علاوہ انہوں نے کہا کہ مولانا فضل الرحمان سے خیبرپختون خوا کی حکومت گرانے کی کسی نے کوئی بات نہیں کی، پی ٹی آئی کی حکومت اور بانی پی ٹی آئی کی امانت کو گنڈاپور اچھے طریقے سے سنبھالے ہوئے ہیں۔رانا ثنا اللہ نے واضح کیا کہ پی ٹی آئی کی صوبائی حکومت کے خلاف تحریک عدم اعتماد لانے کا معاملہ زیر غور نہیں، پی ٹی آئی پرامن احتجاج کرے گی اور قانون ہاتھ میں نہیں لے گی تو وہ احتجاج ان کا جمہوری حق ہے۔واضح رہے کہ بدھ کو خیبرپختونخوا کے وزیراعلیٰ علی امین گنڈاپور نے کہا تھا کہ جتنا زور لگانا ہے لگالیں، آئینی طریقے سے حکومت نہیں گراسکتے اور میں تمام اداروں اور ریاست کو چیلنج کرتا ہوں اگر حکومت گرا دی تو سیاست چھوڑ دوں گا۔