محرم الحرام کے پر امن انعقاد کیلئے بھر پورسکیورٹی انتظامات ،علما کرام بھائی چارے کے فروغ میں اپنا کردار ادا کریں،سی سی پی او لاہور

جمعرات 3 جولائی 2025 17:50

لاہور (اُردو پوائنٹ اخبارتازہ ترین - اے پی پی۔ 03 جولائی2025ء) سی سی پی او لاہور بلال صدیق کمیانہ نے کہا ہے کہ محرم الحرام کے پر امن انعقاد کیلئے بھر پورسکیورٹی انتظامات ترتیب دیئے گئے ہیں، علما کرام، جلوس منتظمین قومی یکجہتی، امن اور بھائی چارے کے فروغ میں اپنا بھر پور کردار ادا کریں۔

(جاری ہے)

جمعرات کے روز تفصیلات سے آگاہ کرتے ہوئے سی سی پی او نے بتایا کہ شہرمیں 07محرم الحرام کی مناسبت سے 424 مجالس اور99 عزاداری جلوس برآمد ہوئے، مجالس و جلوسوں کی سکیورٹی پر6ہزار800 سے زائد پولیس افسران و اہلکارماموررہے۔

انہوں نے کہا کہ سرچ اینڈ سویپ آپریشنز اور سنیپ چیکنگ سمیت تمام حفاظتی اقدامات باقاعدگی سے جاری ہیں، عزاداری جلوسوں کی پنجاب سیف سٹیز اتھارٹی و دیگرسی سی ٹی وی کیمروں کے ذریعے مسلسل مانیٹرنگ کی جارہی ہے۔انہوں نے کہا کہ عشرہ محرم کے دوران پولیس، انتظامیہ، اور قانون نافذ کرنے والے ادارے دن رات فیلڈ میں موجود ہیں، مذہبی منافرت پر مبنی لٹریچر، وال چاکنگ اوراشتعال انگیز مواد کی تشہیر کی پابندی پر سختی سے عمل درآمد کروایا جائے گا۔