وزیر بحری امور سے عمانی سفیر کی ملاقات، دو طرفہ تعاون پر تبادلہ خیال

پاکستان عمان کے ساتھ دیرپا شراکت داری چاہتا ہے،عمان کی بندرگاہی مہارت سے استفادہ کرنا چاہتے ہیں، وفاقی وزیر

جمعرات 3 جولائی 2025 18:00

اسلام آباد (اُردو پوائنٹ اخبارتازہ ترین - این این آئی۔ 03 جولائی2025ء)وفاقی وزیر بحری امور محمد جنید انوار چوہدری سے عمانی سفیر نے ملاقات کی ،اس موقع پر دو طرفہ بحری تعاون پر تفصیلی تبادلہ خیال کیا گیا۔جمعرات کو ہونے والی ملاقات میں گفتگو کرتے ہوئے وفاقی وزیر جنید انوار چوہدری نے کہا پاکستان اور عمان کے درمیان سرمایہ کاری کے مواقع پراتفاق کیا گیا۔

ملاقات میں بحری تربیت، تحقیق اور ٹیکنالوجی پر تعاون پر بات چیت ہوئی۔وفاقی وزیر نے کہا کہ پاکستان عمان کے ساتھ دیرپا شراکت داری چاہتا ہے،عمان کی بندرگاہی مہارت سے استفادہ کرنا چاہتے ہیں۔ عمانی سفیر نے گوادر بندرگاہ میں کاروباری سرگرمیوں میں دلچسپی کا اظہار کیا ہے۔عمانی سفیر نے تجارتی تعاون کی پیشکش کی ،جدید بندرگاہی انتظام اور ساحلی ترقی میں تعاون کیا جائے گا۔

(جاری ہے)

انہوں نے کہا کہ ملاقات میں دونوں ممالک کے بحری وڑن کی ہم آہنگی پر اطمینان کا اظہار کیا گیا۔ ملاقات کے دوران وفاقی وزیر نے عمانی طلبہ کے لئے پاکستان میرین اکیڈمی میں داخلوں کا اعلان کیا۔اس حوالے سے بات کرتے ہوئے عمانی سفیر نے کہا کہ پاکستان میرین اکیڈمی میں عمانی طلبا کے لئے داخلے خوش آئند ہیں۔وفاقی وزیر جنید انوار چوہدری نے کہا کہ پاکستان میرین اکیڈمی کویونیورسٹی کا درجہ دینے کے اقدامات کر رہے ہیں۔