اسلام آباد،پروٹوکول میں برطانیہ جانے کی کوشش کرنیوالی برٹش خاتون سے منشیات برآمد

جمعرات 3 جولائی 2025 21:05

اسلام آباد (اُردو پوائنٹ اخبارتازہ ترین - این این آئی۔ 03 جولائی2025ء)نیو اسلام آباد انٹرنیشنل ائیرپورٹ پر برطانوی شہریت کی حامل خاتون کے سامان سے منشیات برآمد کرلی گئی۔ رپورٹ کے مطابق سرگودھا سے تعلق رکھنے والی مہوش نامی خاتون ایئرپورٹ پہنچی، خاتون نجی ایئر لائن کی پرواز کے زریعے برطانیہ جانا چاہتی تھی۔ذرائع کے مطابق خاتون کو ایئرپورٹ پر ایک سرکاری محکمے کا سب انسپکٹر پروٹوکول دے رہا تھا، اے ایس ایف کی پہلی بیگیج سکیننگ مشین کائونٹر سے سامان کلیئر کردیا گیا۔

بورڈنگ کے بعد خاتون ہینڈ کیری کیساتھ دوسرے سکیننگ پوائنٹ پر پہنچی تو سامان میں رکھے پشاوری جوتوں سے ایک کلو گرام کے قریب ہیروئن برآمد ہوئی، منشیات جوتوں کے تلوں میں چھپائی گی تھی۔منشیات برآمد ہونے پر ایئرپورٹ پر کھلبلی مچ گئی، خاتون کو تحویل میں لیا گیا تو اس نے اپنے ابتداہی بیان میں بتایا کہ اس کو جوتے کسی نے برطانیہ میں کسی کو دینے کیلئے دیئے تھے۔

(جاری ہے)

خاتون کو پروٹوکول دینے والے سرکاری محکمے کے اہلکار سے اس حوالے سے تحقیقات کی گئی تو وہ بھی کسی کے کہنے پر پروٹوکول دینے کیلئے وہاں موجود پایا گیا۔ایئرپورٹ ڈیپارچر لانج کے اے ایس ایف کے پہلے کائونٹر کی سکیننگ سے منشیات کیساتھ سامان کسے کلیئر ہوا، اس کی بھی تحقیقات شروع کردی گئیں۔ذرائع نے کہا کہ خاتون مسافر کو برآمد ہونیوالی منشیات سمیت اے این ایف کے حوالے کردیا گیا۔