آرٹیفیشل انٹیلی جنس اور آئی ٹی کے میدان میں ہنگامی اقدامات کی ضرورت ہی: ملک وقاص سعید

جمعرات 3 جولائی 2025 21:05

i لاہور (اُردو پوائنٹ اخبارتازہ ترین - آن لائن۔ 03 جولائی2025ء) پاکستان مرکزی مسلم لیگ کے آئی ٹی ہیڈ ملک وقاص سعید نے کہا ہے کہ آئی ٹی کسی بھی قوم کی ترقی کے لئے ریڑھ کی ہڈی کی حیثیت رکھتی ہے۔پاکستان کو اس وقت جدید ٹیکنالوجی، آرٹیفیشل انٹیلیجنس ، اور آئی ٹی کے میدان میں ہنگامی اقدامات کی ضرورت ہے۔ مرکزی مسلم لیگ نے اپنا کماؤ پروگرام کے ذریعے ملک بھر کو آئی ٹی پارک بنا دیا، سات جولائی سے بچوں کے لئے سمارٹ سکلز کیمپس کے نام سے تربیتی کورس کا آغاز کر رہے ہیں، مرکزی مسلم لیگ نے حکومت میں نہ ہوتے ہوئے بھی لاکھوں نوجوانوں کو مفت آئی ٹی تربیت فراہم کی ہے۔

ان خیالات کا اظہار انہوں نے پاکستان مرکزی مسلم لیگ کے ڈیجیٹل روزگار پروگرام صلاحیت بڑھاؤ،اپنا کماؤ کا دس روزہ کورس کرنے والے شرکا میں سرٹفکیٹ تقسیم کرنے کی تقریب سے خطاب کرتے ہوئے کیا۔

(جاری ہے)

تقریب سے ڈاکٹر جواداکرم، ڈاکٹر نعمان فاروق، ریحانہ فردوس، احمد اجمل ودیگر نے بھی خطاب کیا۔ تقریب کے اختتام پر اپنا کماؤ کاکورس کرنے والے شرکا میں سرٹفکیٹ تقسیم کئے گئے، ملک وقاص سعید کا کہنا تھا کہ صلاحیت بڑھاؤ، اپنا کماؤ پروگرام کے تحت مرکزی مسلم لیگ نے ملک بھر میں سینکڑوں مفت آئی ٹی کلاس رومز قائم کیے جہاں مرد، خواتین اور بچے یکساں طور پر مستفید ہو رہے ہیں۔

حکومت آئی ٹی کے بجٹ میں کٹوتی کی بجائے نوجوانوں کو مایوسی سے نکال کر جدید دور سے ہم آہنگ کرے۔ملک کی ترقی تب ہی ممکن ہے جب ہم نوجوانوں کو جدید مہارتیں، آئی ٹی اور اے آئی جیسے شعبوں میں مضبوط بنائیں۔صلاحیت بڑھاؤ، اپنا کماؤ مہم کے دوسرے مرحلے کا جلد آغاز کر رہے ہیں۔ ملک وقاص سعید کا کہنا تھا کہ تعلیمی اداروں میں گرمیوں کی چھٹیوں کے دوران بچوں کے لئے بھی مرکزی مسلم لیگ تربیتی پروگرام لے کر آ رہی ہے، سات جولائی سے سات روزہ تربیتی پروگرام کا آغاز کر رہے ہیں، دو گھنٹے کی کلاس میں نو سے 13 برس کے بچوں کو آئی ٹی سے متعلقہ کورس کروائے جائیں گے، اس ضمن میں رجسٹریشن جاری ہے، والدین بچوں کا وقت ضائع کرنے کی بجائے اسے قیمتی بنائیں۔