نانگا پربت سر کرنے کی مہم کے دوران غیر ملکی کوہ پیما ہلاک ہوگئی

جمعہ 4 جولائی 2025 14:30

اسلام آباد (اُردو پوائنٹ اخبارتازہ ترین - این این آئی۔ 04 جولائی2025ء)نانگا پربت سر کرنے کی مہم کے دوران چیک ری پبلک کی کوہ پیما سیاح خاتون کولاوشاوا کلارا ہلاک ہوگئی۔نانگا پربت کی مہم جوئی کرنے والی چیک ریپبلک سے تعلق رکھنے والی غیر ملکی سیاح خاتون کولاوشاوا کلارا کے ساتھ ٹریکنگ کے دوران کیمپ ون اور ٹو کے درمیان حادثہ پیش آیا۔الپائن کلب آف پاکستان نے نانگا پربت پر چیک کوہ پیما کی ہلاکت کی تصدیق کردی ہے۔

46 سالہ کلارا کولو چووا کیمپ ون اور کیمپ ٹو کے درمیان حادثے کا شکار ہوئیں۔نائب صدر الپائن کلب کرار حیدری کے مطابق حادثہ صبح چار بجے کے لگ بھگ پیش آیا تھا، ریسکیو ٹیمیں جائے حادثہ پر ہلاک کوہ پیما کی باڈی تلاش کرنے نکل پڑی ہیں۔کرار حیدری نے کہا کہ کلارا کا شمار مایہ ناز کوہ پیماؤں میں ہوتا تھا، وہ کے ٹو اور ایوریسٹ بھی سر کرچکی تھی۔

(جاری ہے)

اس سے قبل دیامر پولیس کا کہنا تھا کہ حادثہ آکسیجن گیس سلنڈر پھٹنے سے پیش آیا۔غیر ملکی سیاح خاتون کولا وشاوا کلارا حادثے کے نتیجے میں ساتھیوں سے بچھڑ گئی تھی۔ کلارا اپنی ٹیم کے ہمراہ 15 جون کو شنگریلا ہوٹل میں قیام پذیر رہیں۔ 16 جون کو بونر بیس کیمپ کی طرف روانہ ہوئیں۔ ٹیم 17 جون کو بونر بیس کیمپ پہنچیں، کیمپ ون اور ٹو کے درمیان دورانِ ٹریکنگ یہ افسوسناک حادثہ پیش آیا۔

متعلقہ حکام نے واقعے کی تحقیقات شروع کردی ہیں۔ کلارا کی ٹیم کو ہر ممکن معاونت فراہم کی جا رہی ہے۔ایڈیشنل ڈپٹی کمشنر دیامر کے مطابق چیک ری پبلک کی کوہ پیما کیمپ ون اور کیمپ ٹو کے درمیان اونچائی سے گریں، خاتون کوہ پیما کے ساتھیوں نے بیس کیمپ پر خاتون کی ہلاکت کی اطلاع دی۔اے ڈی سی نے بتایا کہ جہاں خاتون کوہ پیما گری تھیں، لوکیشن ٹریس کی جائے گی، لوکیشن ٹریس ہونے کے بعد ریسکیو کا کام شروع ہوگا۔