نیشنل سپورٹس پالیسی کی خلاف ورزی ، پی ایس بی کی جانب سےکھیلوں کی فیڈریشنز کے 9 عہدیداران کو انتباہی خط

جمعہ 4 جولائی 2025 14:40

اسلام آباد (اُردو پوائنٹ اخبارتازہ ترین - اے پی پی۔ 04 جولائی2025ء) پاکستان سپورٹس بورڈ (پی ایس بی) نے کھیلوں کی فیڈریشنز میں 2 مدتوں سے زائد عہدوں پر برقرار رہنے کا نوٹس لے لیا ہے ، نیشنل سپورٹس پالیسی 2005 کی خلاف ورزی پر کھیلوں کی مختلف فیڈریشنز کے 9 عہدیداران کو انتباہی خط ارسال کر دیئے گئے ہیں۔ ترجمان پی ایس بی خرم شہزاد کے مطابق انتباہی خط میں ہدایت دی گئی ہے کہ "نیشنل سپورٹس پالیسی 2005" کی شق 10(اے)(5) کے تحت کسی بھی فیڈریشن یا ایسوسی ایشن کے کسی عہدیدار کی مدت عہدہ چار (4) سال ہوگی اور کوئی بھی فرد زیادہ سے زیادہ دو (2) مدتوں کے لئے کسی بھی عہدے پر فائز رہ سکتا ہے۔

دو مدتیں مکمل کرنے کے بعد وہ فرد اسی فیڈریشن یا ایسوسی ایشن میں دوبارہ اسی عہدے کے لےا نااہل قرار پاتا ہے تاہم ایسے افراد کو کسی اعلیٰ عہدے یا کسی اور ایسوسی ایشن کے لئے کسی بھی وقت انتخاب لڑنے کی اجازت ہے۔

(جاری ہے)

پی ایس بی نے اپنے مراسلے میں سپریم کورٹ آف پاکستان کے ایک فیصلے کا حوالہ بھی دیا جس میں قرار دیا گیا کہ اگر کوئی سپورٹس فیڈریشن پی ایس بی سے الحاق چاہتی ہے اور اس کے فوائد حاصل کرنا چاہتی ہے تو اسے نیشنل سپورٹس پالیسی پر مکمل عمل درآمد یقینی بنانا ہوگا۔

پی ایس بی نے اپنے نوٹسز میں نشاندہی کی کہ پاکستان بیس بال فیڈریشن کے صدر،سیکرٹری جنرل اور خزانچی ، پاکستان تائیکوانڈو فیڈریشن اور پاکستان جوڈو فیڈریشن کے صدور اور سیکرٹریز ، پاکستان سیلنگ فیڈریشن اور پاکستان کراٹے فیڈریشن کے سیکرٹری جنرلز اپنی دو مقررہ مدتوں سے تجاوز کر چکے ہیں جو کہ سپورٹس پالیسی کی صریحا خلاف ورزی ہے ۔ پی ایس بی مراسلے میں خبردار کیا گیا ہے کہ 30 یوم میں اصلاح احوال نہ ہونے کی صورت میں متعلقہ فیڈریشنز پی ایس بی سے ملنے والے فوائد (بینی فٹس )سے محروم ہو جائیں گی۔