لاہور ہائیکورٹ میں قصور کی گرین بیلٹ کی بحالی کیلئے دائر درخواست پر سماعت نہ ہو سکی

جمعہ 4 جولائی 2025 23:05

لاہور (اُردو پوائنٹ اخبارتازہ ترین - آن لائن۔ 04 جولائی2025ء) لاہور ہائیکورٹ میں قصور کی گرین بیلٹ کی بحالی کے لئے دائر متفرق درخواست پر درخواست گزار کے وکیل کی مصروفیات کے باعث سماعت نہ ہوئی۔ عدالت نے سماعت 11 جولائی تک ملتوی کر دی۔ عدالت نے جوڈیشل واٹر کمیشن سے گرین بیلٹ کی بحالی پر رپورٹ طلب کررکھی ہے۔ جسٹس شاہد کریم نے جوڈیشل ایکٹوزم پینل کی درخواست پر سماعت کی۔

(جاری ہے)

درخواست گزار کا موقف تھا کہ قصور فیروز پور روڈ کی گرین بیلٹ مناسب دیکھ بحال نہیں کی جا رہی، گرین بیلٹ سے گھاس اور درخت ختم ہو رہے ہیں، گرین بیلٹ صحت مند کرتی اور ذہنی دباؤ کم کرتی ہے، گرین بیلٹ آکسیجن فراہم کرنے میں مدد دیتی ہے۔ درخواست میں استدعا تھی کہ عدالت فیروز پور روڈ قصور کی گرین بیلٹ بحال کرنے کا حکم دے، عدالت گرین بیلٹ کی روزانہ کی بنیاد پر دیکھ بھال کرنے کی ہدایت کرے۔