ترکی کے ماہر کارڈیک سرجنز کی جانب سے 70 کامیاب پیڈیاٹرک سرجریز کی تکمیل پر لیڈی ریڈنگ ہسپتال میں خصوصی تقریب

جمعہ 4 جولائی 2025 22:45

پشاور(اُردو پوائنٹ اخبارتازہ ترین - این این آئی۔ 04 جولائی2025ء) وزیر اعلیٰ خیبر پختونخوا کے مشیر برائے صحت احتشام علی نے لیڈی ریڈنگ ہسپتال پشاور میں بچوں کی 70 کامیاب کارڈیک سرجریز کی تکمیل پر منعقدہ تقریب میں بطور مہمانِ خصوصی شرکت کی۔ یہ سرجریز ترکی سے آئے ہوئے 10 مایہ ناز کارڈیک سرجنز پر مشتمل وفد نے انجام دیں، جو" لٹل ہارٹ مشن"کے تحت خیبر پختونخوا میں انسانی خدمت کی غرض سے آئے تھے۔

تقریب سے خطاب کرتے ہوئے مشیر صحت احتشام علی نے ترکی سے آئے ماہرین کو صوبائی حکومت کی جانب سے خوش آمدید کہا اور ان کی بے مثال خدمات کو سراہا۔ اُنہوں نے کہا کہ‘‘آج میرا سر فخر سے بلند ہے کہ ہم نے ستر ننھے بچوں کی جان بچائی، یہ صرف ایک کامیاب مشن نہیں بلکہ انسانیت کی خدمت کا عظیم مظاہرہ ہے۔

(جاری ہے)

’’احتشام علی نے کہا کہ‘‘ایل آر ایچ پیڈیاٹرک یونٹ نے ایک اور سنگ میل عبور کیا ہے، اور اس مشن سے نہ صرف بچوں کو نئی زندگی ملی بلکہ ہمارے مقامی عملے کی پیشہ ورانہ استعداد میں بھی خاطر خواہ اضافہ ہوا ہے۔

’’انہوں نے کہا کہ ترکی کے ڈاکٹرز نے جن پیچیدہ جراحی قلب کے عمل کو سر انجام دیا، وہ ہمارے اپنے کارڈیک سرجنز کے لیے ایک تربیتی موقع بھی تھا۔‘‘اب ہمارے اپنے ڈاکٹرز بھی ایسی پیچیدہ سرجریز سرانجام دینے کے قابل ہوں گے، جو ہمارے نظامِ صحت کے لیے خوش آئند ہے،’’اُنہوں نے کہاکہ‘‘لٹل ہارٹ مشن’’کے بانی ادارے مونٹاڈا ایڈ، خصوصاً اس کے سی ای او شیخ نائف اور ان کی ٹیم کا خصوصی شکریہ ادا کیا، جنہوں نے اس مشن کو ممکن بنایا۔

انہوں نے کہا کہ مونٹاڈا اب تک چودہ ممالک میں 50 مشنز کے دوران 3000 سے زائد سرجریز انجام دے چکی ہے، جس سے ہزاروں بچوں کی جانیں بچائی گئی ہیں۔انہوں نے مزید بتایا کہ ان بچوں کا تعلق ملک کے مختلف حصوں سے تھا، جن میں اکثریت پشاور سے تھی۔ مشیر صحت نے ایل آر ایچ انتظامیہ اور مشن سے وابستہ تمام افراد کو اس کامیابی پر مبارکباد دی۔آخر میں انہوں نے اعلان کیا کہ ایل آر ایچ پر مریضوں کا بوجھ کم کرنے کے لیے صوبے کے ضلعی ہیڈکوارٹر ہسپتالوں کی استعداد کار میں اضافہ کیا جا رہا ہے تاکہ صحت کی معیاری سہولیات ہر ضلع میں فراہم کی جا سکیں۔