سابق آل راؤنڈرمحمدحفیظ ورلڈ چیمپئن شپ آف لیجنڈز میں پاکستان کے کپتان مقرر

اعلان پاکستان چیمپئنز نے اپنے آفیشل سوشل میڈیا پلیٹ فارم پر کیا‘یونس خان کی جگہ نیا کپتان مقرر کرنے کی تصدیق

ہفتہ 5 جولائی 2025 12:16

سابق آل راؤنڈرمحمدحفیظ ورلڈ چیمپئن شپ آف لیجنڈز میں پاکستان کے کپتان ..

لاہور(اُردو پوائنٹ اخبارتازہ ترین - این این آئی۔ 05 جولائی2025ء)پاکستان کے سابق آل راؤنڈر محمد حفیظ کو برمنگھم میں ہونے والی ورلڈ چیمپئن شپ آف لیجنڈز کے دوسرے ایڈیشن کے لیے پاکستان چیمپئنز ٹیم کا کپتان مقرر کر دیا گیا۔یہ اعلان پاکستان چیمپئنز نے اپنے آفیشل سوشل میڈیا پلیٹ فارم پر کیا جس میں حفیظ کو سابق کپتان یونس خان کی جگہ نیا کپتان مقرر کرنے کی تصدیق کی گئی۔

بیان میں مزید کہا گیا کہ ''ہمیں محمد حفیظ کو سیزن 2 کے لیے پاکستان چیمپئنز کا کپتان بنانے کا اعلان کرنے پر فخر ہے۔پچھلے سال ایک کامیاب افتتاحی ایڈیشن کے بعد ڈبلیو سی ایل ٹی 20 لیگ جولائی-اگست کی ونڈو میں واپس آتی ہے، جس میں چھ ممالک پاکستان، بھارت، آسٹریلیا، جنوبی افریقہ، انگلینڈ اور ویسٹ انڈیز کے ریٹائرڈ کرکٹرز ستارے شامل ہیں۔

(جاری ہے)

گزشتہ ایڈیشن میں پاکستان چیمپئنز نے شاندار مہم چلائی تھی۔ انہوں نے آسٹریلیا کے خلاف جیت کے ساتھ شروعات کی اور اس کے بعد ویسٹ انڈیز کے خلاف زبردست کارکردگی کا مظاہرہ کیا۔ان کے شاندار لمحات میں سے ایک روایتی حریف بھارت کے خلاف ایک اعلی اسکورنگ مقابلے میں آیا، جہاں انہوں نے 243/4 پوسٹ کیا اور بھارت کو 175/9 تک محدود کردیا۔یونس خان کی قیادت میں پاکستان نے انگلینڈ کے خلاف فتح کے ساتھ اپنی جیت کا سلسلہ جاری رکھا، اسے جنوبی افریقہ کے خلاف گروپ مرحلے میں واحد شکست کا سامنا کرنا پڑا۔

انہوں نے سیمی فائنل میں ویسٹ انڈیز کو شکست دے کر فائنل میں جگہ پکی کی۔فائنل میں پاکستان نے 157 رنز کا ہدف دیا۔ تاہم، بھارت نے کامیابی کے ساتھ 19.1 اوور میں اس کا تعاقب کرتے ہوئے پانچ وکٹوں سے جیت کر ٹائٹل اپنے نام کیا۔ڈبلیو سی ایل کا دوسرا سیزن 18 جولائی کو برمنگھم کے مشہور ایجبسٹن اسٹیڈیم میں پاکستان چیمپئنز کا مقابلہ انگلینڈ چیمپئنز کے ساتھ شروع ہوگا۔روایتی حریفوں بھارت اور پاکستان کے درمیان انتہائی متوقع تصادم 20 جولائی کو اسی مقام پر شیڈول ہے۔