ایس ڈی ایم اے نےحالیہ مون سون بارشوں اور محرم الحرام کےسلسلے میں تیاریاں مکمل کرلیں

ہفتہ 5 جولائی 2025 22:45

مظفرآباد (اُردو پوائنٹ اخبارتازہ ترین - اے پی پی۔ 05 جولائی2025ء) وزیراعظم آزاد حکومت ریاست جموں و کشمیر کی ہدایت پر اسٹیٹ ڈیزاسٹر مینجمنٹ اتھارٹی (ایس ڈی ایم اے) نے حالیہ مون سون بارشوں اور محرم الحرام کے سلسلے میں عوامی تحفظ کو یقینی بنانے کے لیے تیاریاں مکمل کرلی ہیں۔ اس سلسلہ میں ڈائریکٹر جنرل ایس ڈی ایم اے کی زیر صدارت سٹیٹ ایمرجنسی آپریشن سینٹر میں اہم اجلاس منعقد ہوا جس میں ڈائریکٹر انتظامیہ ، ڈائریکٹر آپریشنز اور دیگر آفیسران نے شرکت کی ۔

اجلاس میں قدرتی آفات اور عوامی اجتماعات کے دوران ایمرجنسی رسپانس پر عملی تیاریوں کا جائزہ لیا گیا۔ اجلاس میں مون سون کے حوالے سے اب تک اٹھائے گے اقدامات بارے بھی تفصیلی بریفنگ دی گئی ۔ اجلاس میں آزاد کشمیر میں حالیہ بارشوں کے بعد لینڈ سلائیڈنگ، سڑکوں کی بندش اور دریاؤں میں طغیانی کے خدشات کے پیش نظر موثر اقدامات اٹھانے کا فیصلہ کیا گیا ۔

(جاری ہے)

اجلاس میں تمام اضلاع میں کنٹرول رومز کو 24/7 مکمل طور پر فعال رکھنے ، محکمہ شاہرات کی مشینری اور عملہ فیلڈ کو ہمہ وقت الرٹ رکھنے ، حساس علاقوں کی مسلسل نگرانی اور مقامی آبادی کو پیشگی خبردار کرنے ، ریسکیو 1122، ضلعی انتظامیہ اور سول سوسائٹی اداروں کے درمیان مربوط کوآرڈی نیشن قائم رکھنے کا فیصلہ کیا گیا ۔ علاوہ ازیں محرم الحرام کے دوران سلامتی کے اقدامات اور جلوسوں اور مجالس کے دوران کسی بھی ہنگامی صورتحال سے نمٹنے کے لیے تیاریوں کا جائزہ بھی لیا گیا ۔

ڈائریکٹر جنرل ایس ڈی ایم اے نے کہا کہ مون سون اور محرم الحرام کے دوران عوامی جان و مال کا تحفظ ہماری اولین ترجیح ہے، ایس ڈی ایم اے تیاری کے ساتھ فیلڈ میں موجود ہے اور کسی بھی ہنگامی صورتحال میں پیشگی اقدامات کو ترجیح اول بنایا جارہا ہے ، انہوں نے کہا کہ عوام سے گزارش ہے کہ ایس ڈی ایم اے کی طرف سے جاری کردہ ہدایات پر عمل کریں اور غیر ضروری سفر یا خطرناک علاقوں میں جانے سے گریز کریں۔