مجھے یحییٰ آفریدی پر ترس آتا ہے وہ سیکنڈ کلاس سول جج بنا ہوا ہے، اعتزازاحسن

یہ چیف جسٹس تو ہے لیکن اس کے پاس کوئی اختیارات ہی نہیں ہے، جو 90 فیصد کیسز سپریم کورٹ میں آتے ہیں اس کے پاس وہ سننے کا اختیار بھی نہیں ہے؛ معروف قانون دان کی گفتگو

ساجد علی پیر 7 جولائی 2025 11:19

مجھے یحییٰ آفریدی پر ترس آتا ہے وہ سیکنڈ کلاس سول جج بنا ہوا ہے، اعتزازاحسن

اسلام آباد ( اُردو پوائنٹ اخبارتازہ ترین۔ 07 جولائی 2025ء ) ملک کے معروف قانون دان چوہدری اعتزاز احسن کا کہنا ہے کہ مجھے یحییٰ آفریدی پر ترس آتا ہے وہ سیکنڈ کلاس سول جج بنا ہوا ہے۔ 365 نیوز کو ایک انٹرویو میں انہوں نے کہا کہ سپریم کورٹ میں 15جج لگا دیئے گئے ہیں جن کو سیکنڈ کلاس سول جج بنا دیا ہے، ان کے لیے سپریم کورٹ کے کوئی20 فیصد کیسز سننے والے ہوتے ہیں، جس کی وجہ سے مجھے جسٹس یحییٰ آفریدی پر ترس آتا ہے جس کا میں بہت احترام کرتا تھا جو چیف جسٹس تو ہے لیکن اب وہ سیکنڈ کلاس سول جج بنا ہوا ہے، اس کے پاس اختیارات ہی نہیں ہے، جو 90 فیصد کیسز سپریم کورٹ میں آتے ہیں اس کے پاس وہ سننے کا اختیار بھی نہیں ہے۔

چوہدری اعتزاز احسن یہ بھی کہہ چکے ہیں کہ میں کھل کر کہہ رہا ہوں کہ عدالتوں سے وہی فیصلے آتے ہیں جو آرمی چیف کہہ دے، میں تو بتا رہا ہوں اور کھل کر یہ کہہ رہا ہوں کہ آرمی چیف جو کہہ دیں عدالتوں میں اوپر سے نیچے تک وہی فیصلے آتے ہیں، نواز شریف کے ساتھ بھی جو ڈیل ہورہی تھی وہ اس بنیاد پر ہورہی تھی کہ باجوہ ایک نہیں بلکہ دو ٹرمز لے گا۔

(جاری ہے)

ایک سوال کے جواب میں معروف قانون دان کا کہنا تھا کہ باجوہ کی آپ مہارت دیکھیں وہ فٹ بال طرح کھیلتا ہوا گیند کو ٹانگوں میں سے نکال کر لیے جاتا ہے، باجوہ کو نواز شریف نے تعینات کیا، سال کے اندر نواز شریف جیل میں ہوتا ہے، اس کے بعد نواز شریف کی جیل کی چھت سے نکل کر لندن پہنچ جاتا ہے جو کہ سزا یافتہ ہے اور کبھی کسی سزا یافتہ شخص کو عدالت کی اجازت کے بغیر جانے نہیں دیتے۔ انہوں نے کہا کہ نواز شریف لندن میں بٹھ کر باجوہ کے خلاف بیان دیتا ہے لیکن جب اس کی ایکسٹینشن کی باری آتی ہے تو نواز شریف اپنے اراکین قومی اسمبلی کو ہدایات دیتا ہے کہ سب نے صبح جاکر اپنی حاضری لگانی ہے، ناشتہ سپیکر لاؤنج میں کرنا ہے اور باجوہ کو ووٹ دینا ہے۔