نیشنل سکیورٹی پرنٹنگ کمپنی اور پاکستان سکیورٹی پرنٹنگ کارپوریشن کا انضمام

منگل 8 جولائی 2025 17:09

اسلام آباد (اُردو پوائنٹ اخبارتازہ ترین - اے پی پی۔ 08 جولائی2025ء) پاکستان سکیورٹی پرنٹنگ کارپوریشن (پرائیویٹ) لمیٹڈ (پی ایس پی سی) نے کہا ہے کہ نیشنل سکیورٹی پرنٹنگ کمپنی (پرائیویٹ) لمیٹڈ (این ایس پی سی) کو پی ایس پی سی میں ضم کر دیا گیا ہے جو یکم جولائی 2025ء کے یوم کار کے آغاز سے نافذالعمل ہے۔ اس انضمام کے نتیجے میں این ایس پی سی کے تمام اثاثے، واجبات، حقوق، ذمہ داریاں، معاہدے اور سودے اب مستقل طور پر پی ایس پی سی کا حصہ بن چکے ہیں۔

این ایس پی سی انضمام کی اس تاریخ سے ایک علیحٰدہ قانونی ادارے کے طور پر موجود نہیں ہے اور اسےتحلیل کے بغیر ضم کر دیا گیا ہے۔پاکستان سکیورٹی پرنٹنگ کارپوریشن نے جو بینک دولت پاکستان کا مکمل ملکیتی ذیلی ادارہ ہے، وفاقی حکومت سے نیشنل سکیورٹی پرنٹنگ کمپنی کو اپنی تحویل میں لیا تھا جس کا مقصد آپریشنل ہم آہنگی کا حصول اور صارفین کو ملنے والی خدمات کی مزید بہتر فراہمی تھا۔

(جاری ہے)

اب اس سٹریٹجک انضمام کے نتیجے میں وسائل موثر طور پر استعمال ہوں گے اور سکیورٹی پرنٹنگ کی سہولتوں کی فراہمی میں ہم آہنگی آئے گی ۔ اس طرح صارفین کو جدید اور معیاری مصنوعات ملیں گی۔سرکاری و نجی شعبے سے تعلق رکھنے والے نیشنل سکیورٹی پرنٹنگ کارپوریشن کے تمام متعلقہ فریقوں (سٹیک ہولڈرز) اور صارفین کو موجودہ انتظامات کے تحت خدمات کی بلاتعطل فراہمی جاری رہے گی۔ پاکستان سکیورٹی پرنٹنگ کارپوریشن اپنی ذمہ داریاں پوری کرنے اور صارفین کے تعاون سے اعلیٰ معیار کی مصنوعات و خدمات کی فراہمی کے لئے پرعزم ہے ۔