مسابقتی کمیشن نے 50 ملین ڈالر کی غیر ملکی سرمایہ کاری کی ٹرانزیکشن کی منظوری دے دی

اسلام آباد (اُردو پوائنٹ اخبارتازہ ترین - اے پی پی۔ 08 جولائی2025ء) مسابقتی کمیشن آف پاکستان نے مالی سال 25۔2024ء کے دوران مجموعی طور پر 69 مرجرز اور ایکوزیشنز کی ٹرانزیکشنز کی منظوری دے دی جن میں غیر ملکی کمپنیوں کی جانب سے پاکستانی کمپنیوں میں انضمام اور شراکت داری کی درخواستیں بھی شامل تھیں۔ غیر ملکی کمپنیوں کی ان ٹرانزیکشن کے نتیجے میں تقریباً 50 ملین ڈالر کی براہِ راست غیر ملکی سرمایہ کاری پاکستان میں آئی۔

یہ ٹرانزیکشنز خوراک، مالیات، لاجسٹکس، ایرو اسپیس، میڈیا اور ای کامرس کے شعبوں میں ہوئیں ۔اہم غیر ملکی ٹرانزیکشنز جن کے ذریعے ڈائریکٹ انوسٹمنٹ آئی، ان میں نیشنل لاجسٹکس سیل ( این ایل سی) اور ڈی پی ورلڈ لاجسٹکس دبئی کے مابین مشترکہ منصوبہ شامل ہے جو کہ سپیشل انویسٹمنٹ فیسلی ٹیشن کونسل کے ذریعے ممکن ہوا۔

(جاری ہے)

اسی طرح ای کامرس کے شعبے میں بازار ٹیکنالوجیز نے ویمل سول کو ایکوائر کیا۔

زرعی شعبے میں اٹلی کی کمپنی میسرز یوریکوم نے فاطمہ یوریکوم رائس ملز کے 50 فیصد حصص حاصل کیے۔ میڈیا کے شعبے میں برکلے اسکوائر ہولڈنگ نے اوگلیوی اینڈ میتھر، مائنڈ شیئر اور سوہو اسکوائر پاکستان کے 50 فیصد حصص حاصل کیے۔ مزید برآں، سعودی کمپنی واکعب ڈیٹا نے ڈرون ٹیکنالوجی کمپنی ووٹ ٹیک کے 80 فیصد حصص خریدے۔غیر ملکی سرمایہ کاری کے علاوہ، کمپٹیشن کمیشن نے مقامی سطح پر 64 مرجر ٹرانزیکشنز کی منظوری دی جن میں صنعتی و پیداواری شعبہ میں 25، توانائی میں 14، خدمات میں 13، فنانس میں 11، ریٹیل و صارفین کی اشیاء میں 5، اور رئیل اسٹیٹ کے شعبے ایک ٹرانزیکشن کی منظوری دی گئی۔

اہم مقامی سودوں میں یونائیٹڈ عرب امارات کی وافی انرجی کے ذریعےعصیاد ہولڈنگ کی شیل پاکستان میں 77.42 فیصد حصص کی خریداری شامل ہے جو توانائی کے شعبے میں ایک بڑی ٹرانزیکشن رہی۔ الفلاح ایسیٹ مینجمنٹ نے فیصل ایسیٹ مینجمنٹ سے فنڈ مینجمنٹ کے حقوق حاصل کئے جبکہ سفائر فائبرز اور مائنڈ برج نے اوچ پاور اور اوچ-II پاور کو مشترکہ طور پر حاصل کیا۔

دیگر نمایاں سودوں میں پی پی آر ہولڈنگ کا سادہ پے ٹیکنالوجیز کی مکمل ملکیت حاصل کرنا، نِمر انڈسٹریل کیمیکلز کا پراکٹر اینڈ گیمبل پاکستان کے اثاثے حاصل کرنا، نوشہرہ بوٹلنگ کمپنی کا جے کے شوگر ملز کے بوٹلنگ فسیلٹی خریدنا، اور ڈی ڈبلیو پی انجینئرنگ انڈسٹریز کا ڈیجیٹل ورلڈ پاکستان کے ساتھ انضمام شامل ہیں۔اس کے علاوہ، مالی سال 2024-25 کے دوران کمیشن نے کمپٹیشن ایکٹ 2010 کے تحت 38 مشروط استثنیٰ بھی دیئے۔ یہ استثنیٰ مختلف شعبہ جات میں دیئے گئے جن میں آٹوموٹیو، دواسازی، صارفین کی اشیاء، خوراک و مشروبات، توانائی، لاجسٹکس، ٹیلی کمیونیکیشن، بینکاری و مالیات، تمباکو، ہوا بازی، اور پیکیجنگ شامل ہیں۔