چار سال پنجاب میں کرپشن، نااہلی اور لوٹ مار کا سیاہ ترین دور تھا‘ عظمیٰ بخاری

مسٹرجعلی دانشور آڈٹ رپورٹ غور سے پڑھیں اس میں پی ٹی آئی قیادت کا کچا چٹھا ہے‘وزیراطلاعات پنجاب

بدھ 9 جولائی 2025 17:03

چار سال پنجاب میں کرپشن، نااہلی اور لوٹ مار کا سیاہ ترین دور تھا‘ عظمیٰ ..

لاہور (اُردو پوائنٹ اخبارتازہ ترین - این این آئی۔ 09 جولائی2025ء)وزیراطلاعات پنجاب عظمیٰ بخاری نے کہا ہے کہ چار سال پنجاب میں کرپشن، نااہلی اور لوٹ مار کا سیاہ ترین دور تھا۔وزیراطلاعات پنجاب عظمی بخاری نے مشیر اطلاعات خیبر پختونخوا بیرسٹر سیف کے بیان پر ردعمل دیتے ہوئے کہا کہ مسٹرجعلی دانشور آڈٹ رپورٹ غور سے پڑھیں اس میں پی ٹی آئی قیادت کا کچا چٹھا ہے، جس آڈٹ رپورٹ کا آپ لوگ ڈھنڈورا پیٹ رہے وہ رپورٹ بزدار اور پرویز الٰہی دورکی ہے۔

عظمیٰ بخاری نے کہا کہ آڈٹ رپورٹ کا صفحہ نمبر 87اور صفحہ نمبر 96پڑھ لیں شاید آپ کو تھوڑی سی شرم آجائے، جس 10کھرب کا آپ واویلا کررہے ہیں وہ 2018سے 2023کی گندم خریداری اور سبسڈی کا ہے، 2018سے 2023تک پنجاب میں کس کی حکومت تھی پوری قوم جانتی ہے۔

(جاری ہے)

صوبائی وزیر اطلاعات نے مزید کہا کہ چار سال پنجاب میں کرپشن، نااہلی اور لوٹ مار کا سیاہ ترین دور تھا، 12سال سے جو لوٹ مار خیبرپختونخوا میں ہو رہی ہے چار سال پنجاب میں وہی لوٹ مار ہوئی، ان چار سالوں میں بشری بی بی اور فرح گوگی کے ڈاکے اور چوریاں بھی ریکارڈ کا حصہ ہیں۔

عظمیٰ بخاری نے کہا کہ شریف فیملی کے بغض میں آپ کا لیڈر وزیراعظم ہاس سے ڈائری اٹھا کر اڈیالہ پہنچ گیا، علی امین اور بیرسٹر سیف کے کارناموں کا انجام بھی ’’نیکسٹ سٹاپ اڈیالہ‘‘ہی نظر آرہا ہے۔