کراچی، حساس ادارے کی کارروائی، 25 لاکھ کی ڈکیتی میں ملوث 3 ڈاکو گرفتار

ملزمان کے قبضے سے چھینی گئی نقدی سمیت دیگر سامان ، واردات میں استعمال کی جانے والی لگژری گاڑی ، موٹر سائیکل اور اسلحہ برآمد ہوا ہے

بدھ 9 جولائی 2025 17:21

کراچی(اُردو پوائنٹ اخبارتازہ ترین - این این آئی۔ 09 جولائی2025ء)حساس ادارے نے خفیہ اطلاع پر چھاپہ مار کارروائی کے دوران ڈکیتی کی واردات میں ملوث 3 ڈاکووں کو گرفتار کرلیا گیا.ذرائع کے مطابق ڈسٹرکٹ ملیر کے انتہائی حساس علاقے میں چند روز قبل 5 جولائی کی رات 11 بجے کے قریب 3 ڈاکووں نے ضیا اسرار نامی ایزی پیسہ شاپ کے مالک کو گھر کی دہلیز پر اسلحے کے زور پر نقدی سے بھرا ہوا بیگ چھینا تھا جس میں 25 لاکھ روپے کی رقم اور موبائل فون کی سمیں بھی موجود تھی.

(جاری ہے)

واردات کے دوران ڈاکووں نے شہری کو خوفزدہ کرنے کے لیے فائرنگ بھی کی تھی اور لوٹ مار کے بعد موقع سے فرار ہوگئی. واردات کی اطلاع ملتے ہی حساس ادارے متحرک ہوگئے اور کچھ ہی گھنٹوں میں واردات میں ملوث ڈاکووں کا سراغ لگا کر انھیں گرفتار کرلیا جن کی شناخت ذیشان ، نعمان اور وجاہت کے نام سے کی گئی.ذرائع نے بتایا کہ ڈاکووں کے قبضے سے چھینی گئی رقم و دیگر سامان ، واردات میں استعمال کی جانے والی لگژری گاڑی فارچونر ، موٹر سائیکل اور اسلحہ برآمد ہوا ہی. گرفتار ڈاکووں میں 2 ڈکیت ماڈل کالونی اور کورنگی کے رہائشی بتائے جاتے ہیں, حساس ادارے نے ابتدائی تفتیش کے بعد تینوں ڈاکووں کو مزید قانونی کارروائی کے لیے ملیر کینٹ پولیس کے حوالے کر دیا ہے ۔