وزیر صحت خواجہ سلمان رفیق کا سرگودھا میں زیر تعمیر نواز شریف انسٹی ٹیوٹ آف کارڈیالوجی کا دورہ ،جاری پیش رفت کا جائزہ

لاہور (اُردو پوائنٹ اخبارتازہ ترین - این این آئی۔ 09 جولائی2025ء)صوبائی وزیر صحت خواجہ سلمان رفیق نے سرگودھا میں زیر تعمیر نواز شریف انسٹی ٹیوٹ آف کارڈیالوجی پر جاری پیش رفت کا جائزہ لینے کیلئے دورہ کیا۔سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود خان، چیئرمین ایڈوائزری کمیٹی برائے امراض قلب ڈاکٹر فرقد عالمگیر، سپیشل سیکرٹری آپریشنز طارق محمود رحمانی، کمشنر سرگودھا ڈویژن جہانزیب اعوان، پرنسپل پروفیسر وارث فاروقہ و دیگر اعلیٰ افسران بھی اس موقع پر موجود تھے۔

صوبائی وزیر خواجہ سلمان رفیق نے حال ہی میں مکمل ہونے والی او پی ڈی کا تفصیلی معائنہ کر کے طبی سہولیات کا جائزہ لیا۔صوبائی وزیر نے ای سی جی، ایکو کارڈیوگرافی، ای ٹی ٹی، ہولٹر مانیٹرنگ اور لیبارٹری ٹیسٹوں کے شعبہ جات سمیت مختلف وارڈز اور تشخیصی یونٹس کا بھی دورہ کیا۔

(جاری ہے)

خواجہ سلمان رفیق نے او پی ڈی میں آئے مریضوں سے براہ راست ملاقات کی اور فراہم کی جانے والی سہولیات کے معیار سے متعلق دریافت کیا۔

صوبائی وزیر صحت خواجہ سلمان رفیق نے کہاکہ وزیر اعلیٰ پنجاب مریم نواز شریف کے ویژن کے مطابق عوام تک صحت کی بہترین سہولیات کی فراہمی کیلئے کوشاں ہیں۔حکومت پنجاب عوام کی سہولت کی خاطر ریکارڈ مدت میں صحت کے نئے منصوبوں کو مکمل کر رہی ہے۔اسٹیٹ آف دی آرٹ نواز شریف انسٹی ٹیوٹ آف کارڈیالوجی سرگودھا میں اردگرد کی لاکھوں کی آبادی کو امراض قلب کے علاج و معالجہ کی بین الاقوامی سطح کی طبی سہولیات میسر آئیں گی۔

کسی بھی سطح پر معیار پر کوئی سمجھوتہ نہیں کیا جائے گا۔ خواجہ سلمان رفیق نے کہاکہ ہسپتال کے اندر مختلف جدید مشینری اور آلات کی ترسیل مکمل ہو چکی ہے۔نواز شریف انسٹی ٹیوٹ آف کارڈیالوجی دسمبر 2025 تک اللہ تعالیٰ کے فضل و کرم سے مکمل طور پر فعال ہو جائے گا۔پرنسپل پروفیسر وارث فاروقہ اور منصوبے پر کام کرنے والے آئی ڈیپ اتھارٹی کے نمائندوں نے صوبائی وزیر کو بریفنگ دیتے ہوئے کہاکہ ہسپتال کی ان ڈور عمارت کا 80 فیصد تعمیراتی کام مکمل ہو چکا ہے۔

بعدازاں کمیٹی روم میں اعلیٰ سطحی اجلاس منعقد ہوا۔اجلاس کے دوران منصوبے کی موجودہ صورتحال اور آئندہ کے مراحل پر تفصیلی بریفنگ دی گئی۔ اجلاس کے دوران مریض کے اسپتال میں داخلے سے لے کر علاج اور واپسی تک کے تمام مراحل کا مشاہدہ اور عملے کی کارکردگی کا جائزہ لیا گیا ۔صوبائی وزیرصحت خواجہ سلمان رفیق نے ایگزی کیوٹنگ ایجنسی کو ہدایت کی کہ منصوبے کی تکمیل میں کوئی تاخیر برداشت نہیں کی جائے گی اور ہر مرحلے پر شفافیت، معیار اور عوامی سہولت کو مقدم رکھا جائے۔

سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود خان نے کہاکہ نواز شریف انسٹی ٹیوٹ آف کارڈیالوجی سرگودھا منصوبہ پر جاری پیش رفت تسلی بخش ہے۔ صحت کے تمام منصوبوں کی مانیٹرنگ کی جا رہی ہے۔ ڈاکٹر فرقد عالمگیر نے کہاکہ وزیر اعلیٰ پنجاب مریم نواز شریف کو عوام کو امراض قلب کی بہترین سہولیات فراہم کرنے پر خراج تحسین پیش کرتے ہیں۔

ڈاکٹر فرقد عالمگیر نے کہاکہ اس منفرد ہسپتال کے بعد ڈویژن کے لاکھوں افراد کو دل کے امراض کیلئے لاہور یا اسلام آباد جانے کی ضرورت نہیں رہے گی۔ سپیشل سیکرٹری آپریشنز طارق محمود رحمانی نے کہاکہ مریضوں کو بہترین سہولیات کی فراہمی اولین ترجیح ہے۔نواز شریف انسٹی ٹیوٹ آف کارڈیالوجی سرگودھا کیلئے بڑی تیزی سے ایچ آر مکمل کیا جا رہا ہے۔