Live Updates

سی ای او ایل ڈبلیو ایم سی کا صفائی آپریشن کا جائزہ لینے کیلئے شہر کے مختلف علاقوں کا دورہ

بدھ 9 جولائی 2025 18:30

لاہور (اُردو پوائنٹ اخبارتازہ ترین - اے پی پی۔ 09 جولائی2025ء) سی ای او ایل ڈبلیو ایم سی بابر صاحب دین نے شہر میں ہونے والی موسلا دھار بارش کے بعد مختلف علاقوں کا دورہ کر کے شاہراہوں کی کلیئرنس کا جائزہ لیا۔ ترجمان کے مطابق سی ای او کی ہدایت پر نکاسی آب کویقینی بنانے کیلئے شاہراہوں سے شاپنگ بیگزاور ریپرز ہٹانے کے لیے صفائی عملہ تعینات رہا جبکہ6000 سے زائد ویسٹ کنٹینرز معمول کے مطابق کلیئر کیے گئے۔

بابر صاحب دین کاکہنا ہے کہ تیز اور مسلسل ہونے والی بارش میں بھی صفائی آپریشن کے ساتھ ساتھ نکاسی آب یقینی بنانے کا عمل جاری رہا۔انہوں نے چونگی امر سدھو، بنک سٹاپ، شنگھائی روڈ، نشتر کالونی، فیروزپور روڈ پر شاہراہوں کی کلیئرنس جبکہ شادمان مارکیٹ، قرطبہ چوک،ایوان تجارت، بیڈن روڈ بازار، ٹیمپل روڈ پر صفائی انتظامات کا جائزہ لیا جبکہ لکشمی چوک،مال روڈ، جیل روڈ، الحمرا، گورنر ہائوس اور ملحقہ سڑکوں پر بھی صفائی ستھرائی یقینی بنائی گئی،اس کے علاوہ سرکلر روڈ، فورٹ روڈ، اعظم کلاتھ مارکیٹ، آزادی چوک پر بھی صفائی ٹیمیں متحرک رہیں۔

(جاری ہے)

مزید برآں تمام ٹائون مینجرز کو بھی فیلڈ میں ورکرز کی 100 فیصد حاضری یقینی بنانے کی ہدایت جاری کی گئی۔انہوں نے شہریوں سے بھی گزارش کی ہے کہ دوران بارش شاہراہوں میں بکھرا کوڑا کرکٹ نکاسی آب میں خلل کا سبب بنتا ہے،کوڑا ہمیشہ کوڑے دان میں ڈالیں،صفائی سے متعلق شکایات کے ازالے اور تجاویز کے لیے ایل ڈبلیو ایم سی کی ہیلپ لائن 1139پر رابطہ یا سوشل میڈیاکا استعمال کریں۔